1-ელი სექტემბრიდან ხმაურიან ავტომობილებზე კონტროლი მკაცრდება

დღეიდან ხმაურიან ავტომობილებზე კონტროლი მკაცრდება. შინაგან საქმეთა სამინისტროს უფლებამოსილი დანაყოფები საგზაო მოძრაობის პირობებში სატრანსპორტო საშუალების ექსპლუატაციისას წარმოქმნილი ხმაურის დონის შემოწმებას, უწყების მიერ შეძენილ, საერთაშორისო სტანდარტთან შესაბამისობაში არსებულ, ხმაურის დონის საზომი პორტატული მოწყობილობის კომპლექტის მეშვეობით განახორციელებენ.

სატრანსპორტო საშუალებების ექსპლუატაციისას წარმოქმნილი ხმაურის დასაშვები ნორმები საქართველოს მთავრობის შესაბამისი დადგენილებით არის რეგულირებული. დადგენილების თანახმად, დასახლებულ პუნქტებში ღამის საათებში - 23:00 საათიდან 08:00 საათამდე, სატრანსპორტო საშუალების ექსპლუატაციისას წარმოქმნილი ხმაური არ უნდა აღემატებოდეს 80 დეციბალს. საქართველოს ადმინისტრაციულ სამართალდარღვევათა კოდექსის თანახმად, თუ ექსპლუატაციისას წარმოქმნილი ხმაური საქართველოს კანონმდებლობით დადგენილ ნორმას აღემატება, ამ შემთხვევაში პირი 100 ლარის ოდენობით დაჯარიმდება და მისი მართვის მოწმობისთვის მინიჭებული ქულები 10-ით შემცირდება. იმავე ქმედების განმეორებით ჩადენის შემთხვევაში ჯარიმა 200 ლარამდე გაიზრდება და მართვის მოწმობის ქულები 20 ქულით შემცირება, ხოლო მესამე და ყოველი მომდევნო შემთხვევისას პირი 300 ლარის ოდენობით დაჯარიმდება და მისი მართვის მოწმობის ქულები 30 ქულით შემცირდება.