გივი მიქანაძე: ჩვენი მთავრობისთვის ძალიან აქტუალურია განათლებული და კვალიფიციური ახალგაზრდების არმიის შექმნა - ყველანაირად ვცდილობთ, ხელი შევუწყოთ თქვენი განათლებისა და განვითარების პროცესს

ჩვენი მთავრობისთვის ძალიან აქტუალურია განათლებული და კვალიფიციური ახალგაზრდების არმიის შექმნა - ყველანაირად ვცდილობთ, ხელი შევუწყოთ თქვენი განათლებისა და განვითარების პროცესს, - განაცხადა განათლების მინისტრმა, გივი მიქანაძემ თბილისის სახელმწიფო სამედიცინო უნივერსიტეტში 2025 წლის კურსდამთავრებულთა გამოსაშვებ ღონისძიებაზე.

“პირველ რიგში, გილოცავთ თქვენ – წლევანდელ კურსდამთავრებულებს, რომლებმაც კიდევ ერთი დიდი ნაბიჯი გადადგით ცხოვრების ახალი და უმნიშვნელოვანესი ეტაპის დასაწყებად.

„საამაყოა, გერქვას თბილისის სახელმწიფო სამედიცინო უნივერსიტეტის კურსდამთავრებული. სწორედ ამ უნივერსიტეტის კედლებში აღიზარდნენ ჩვენი სახელოვანი ექიმები, რომლებმაც მსოფლიოში გაითქვეს სახელი და მათი დაარსებული სამედიცინო სკოლები დღესაც დიდი ავტორიტეტით სარგებლობს.

სახელმწიფოსთვის და პირადად ჩვენი მთავრობისთვის ძალიან აქტუალურია განათლებული და კვალიფიციური ახალგაზრდების არმიის შექმნა. ამიტომ, ჩვენ ყველანაირად ვცდილობთ, ხელი შევუწყოთ თქვენი განათლებისა და განვითარების პროცესს.

ჩვენი ქვეყნის განვითარება მნიშვნელოვნად არის დამოკიდებული თითოეული თქვენგანის წარმატებაზე, სადაც არ უნდა იყოთ, გახსოვდეთ, რომ თქვენ ხართ ამ ქვეყნის ხვალინდელი დღე და თქვენ ქმნით ჩვენი სამშობლოს უკეთეს მომავალს. მჯერა, არასოდეს დაივიწყებთ ჰიპოკრატეს ფიცს და ძალიან მალე თქვენ აუცილებლად იტყვით თქვენს სათქმელს, როგორც შემდგარი პროფესიონალები“, - აღნიშნა გივი მიქანაძემ.

საქართველოს განათლების, მეცნიერებისა და ახალგაზრდობის მინისტრმა გივი მიქანაძემ თბილისის სახელმწიფო სამედიცინო უნივერსიტეტში 2025 წლის კურსდამთავრებულთა გამოსაშვებ ღონისძიებაში მიიღო მონაწილეობა.