ლევან მაჭავარიანი ლაშა შერგელაშვილზე: უღალატა თავის ქვეყანას, ასეთ ადამიანებს უსამშობლოებს ტყუილად არ ვეძახით, ისინი მხოლოდ ეთნიკურად ქართველები არიან, სამწუხაროდ, დანარჩენი - ემსახურებიან უცხო ძალებს

„მან უღალატა შინაგან საქმეთა სამინისტროს, უღალატა თავის ქვეყანას, თუმცა ჩვენ ასეთ ადამიანებს უსამშობლოებს ტყუილად არ ვეძახით“, - ამის შესახებ პარლამენტის ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა ლაშა შერგელაშვილზე საუბრისას განაცხადა.

„ძალიან საინტერესო არის ამ ადამიანის როლი 4 ოქტომბერთან დაკავშირებით და სუსმა ამასთან დაკავშირებით გააკეთა უკვე განცხადება - გამოძიება დაწყებულია და არავის გაუკვირდება, რომ გამოიკვეთოს მისი ბრალეულობა და დადასტურდეს, რომ პარალელურად კიდევ აჟიოტაჟი შემოეტანა და დივერსიული აქტები განეხორციელებინა საქართველოში, ჩვეულებრივი აგენტი არის, რომელიც უცხო ძალებს ემსახურება და ძალიან სამწუხაროა, რომ მან უღალატა შინაგან საქმეთა სამინისტროს, უღალატა თავის ქვეყანას, თუმცა ჩვენ ასეთ ადამიანებს უსამშობლოებს ტყუილად არ ვეძახით, ისინი მხოლოდ ეთნიკურად ქართველები არიან, სამწუხაროდ, დანარჩენი - ემსახურებიან უცხო ძალებს“, - აცხადებს ლევან მაჭავარიანი.

ცნობისთვის, გუნდში BBC-ის მიერ გავრცელებულ მასალასთან დაკავშირებით, გამოძიების ფარგლებში, გამოიკითხა 93 მოწმე, მაგრამ ვერ მოხერხდა ერთადერთი მოწმის, ლაშა შერგელაშვილის გამოკითხვა, რომელიც უკრაინაში იმყოფება. მის მიმართ, სუსში ოპერატიულ-სამძებრო და საგამოძიებო მოქმედებები, ერთ-ერთ რეზონანსულ საქმესთან დაკავშირებით მიმდინარეობს, რომელიც ეხებოდა ბრალდებულ ბექა ჭულუხაძის მიერ იარაღებისა და საბრძოლო მასალის, მათ შორის ტროტილის შეძენა-შენახვის ფაქტს.

საქმეზე ოპერატიული და საგამოძიებო მოქმედებები მიმდინარეობდა 4 ოქტომბრის მოვლენების პარალელურად.

გამოძიება მუშაობს ვერსიაზე, რომ უკრაინის სპეცსამსახურებში კონტრაქტით დასაქმებულმა შერგელაშვილმა 4 ოქტომბრამდე რამდენიმე დღით ადრე შეუკვეთა ბექა ჭულუხაძეს საბრძოლო მასალის, ასაფეთქებელი ნივთიერებებისა და მოწყობილობების შეძენა და გადამალვა თბილისის მახლობლად.