Reuters: ნატო ყოველწლიური სამიტების გაუქმებას განიხილავს

ნატო ყოველწლიური სამიტების ჩატარების ბოლოდროინდელი პრაქტიკის შეწყვეტას განიხილავს. ამის შესახებ Reuters-ს ექვსმა წყარომ განუცხადა.

ნატოს სამიტების სიხშირე ალიანსის 77-წლიანი ისტორიის განმავლობაში იცვლებოდა, თუმცა მისი ლიდერები 2021 წლიდან ყოველ ზაფხულს იკრიბებიან და წელს 7 და 8 ივლისს თურქეთის დედაქალაქ ანკარაში შეხვდებიან.

თუმცა, სააგენტოს წყაროების ცნობით, ზოგიერთი წევრი ტემპის შენელებას დაჟინებით მოითხოვს.

ერთ-ერთმა დიპლომატმა აღნიშნა, რომ ალბანეთში დაგეგმილი 2027 წლის სამიტი, სავარაუდოდ, შემოდგომაზე გაიმართება და ნატო განიხილავს სამიტის საერთოდ არ ჩატარებას 2028 წელს – აშშ-ის საპრეზიდენტო არჩევნების წელს და ტრამპის პრეზიდენტობის ბოლო სრული კალენდარული წლის განმავლობაში.

კიდევ ერთმა დიპლომატმა აღნიშნა, რომ ზოგიერთ ქვეყანას სამიტების ორ წელიწადში ერთხელ ჩატარება სურს და დასძინა, რომ გადაწყვეტილება ჯერ არ არის მიღებული და საბოლოო სიტყვა გენერალურ მდივანს მარკ რუტეს ეკუთვნის.

„ნატო გააგრძელებს სახელმწიფოებისა და მთავრობების მეთაურების რეგულარულ შეხვედრებს და სამიტებს შორის ნატოს მოკავშირეები გააგრძელებენ კონსულტაციებს, დაგეგმვას და გადაწყვეტილებების მიღებას ჩვენი საერთო უსაფრთხოების შესახებ“, - განუცხადა სააგენტოს ნატოს წარმომადგენელმა.

ორმა წყარომ ტრამპი ერთ-ერთ ფაქტორად დაასახელა, მაგრამ რამდენიმე მათგანმა აღნიშნა, რომ უფრო ფართო მოსაზრებებიც იყო განხილული.

„უკეთესია, ნაკლები სამიტები გვქონდეს, ვიდრე ცუდი სამიტები. ჩვენ ბევრი სამუშაო გვაქვს გასაკეთებელი, ვიცით, რა უნდა გავაკეთოთ“, - განაცხადა ერთ-ერთმა დიპლომატმა.