ირაკლი ხელაძე: ქართველი ხალხის ვიზალიბერალიზაციას არასდროს გაცვლის ეროვნულობასა და პატრიოტიზმში

საპარლამენტო უმრავლესობის წევრმა, საფინანსო-საბიუჯეტო კომიტეტის თავმჯდომარის პირველმა მოადგილემ ირაკლი ხელაძემ ვიზალიბერალიზაციის საკითხზე „დღის ქრონიკაში“ ისაუბრა.

ხელაძის თქმით, რადიკალურ ოპოზიციას ქართველი ხალხის შანტაჟის იარაღად მხოლოდ ვიზალიბერალიზაციის საკითხი დარჩა.

„რადიკალურ ოპოზიციას ერთადერთი შანტაჟის იარაღი დარჩა, რომ მუდმივად ქართველ ხალხზე განახორციელოს ზეწოლა ვიზალიბერალიზაციის საკითხით. კარგად გვახსოვს 2022 წლიდან მოყოლებული როგორ ვითარდებოდა მოვლენები, მუდმივად ცდილობდნენ ევროკავშირთან დაკავშირებულ საკითხებზე ხალხისა და ხელისუფლების დაშანტაჟებას. ჩვენ იქიდან წამოსულ თავდასხმებს თავი გავართვით, ახლა ერთადერთი რაც დარჩათ ეს არის ვიზალიბერალიზაციის საკითხი.

11 ივნისის შეხვედრა არის ტექნიკური ხასიათის, თუმცა აქ მოქმედ აგენტურას დავალება მიღებული აქვთ, რომ ამ თემისგან შექმნან ქარიშხალი, რომ ისევ საქართველოს მოქალაქეებზე მოახდინონ გავლენა. თუმცა ქართულმა საზოგადოებამ კარგად იცის რა დგას მეორე მხარეს. დღევანდელი ევროპული ბიუროკრატია რას სთავაზობს ქართულ საზოგადოებას. ქართველი ხალხის ვიზალიბერალიზაციას არასდროს გაცვლის ეროვნულობასა და პატრიოტიზმში“, - აღნიშნა ირაკლი ხელაძემ.