ირაკლი ქადაგიშვილი: საგამოძიებო კომისიის დასკვნა ინგლისურად ითარგმნება, რათა უცხოელებმა იცოდნენ, ვისთან და რასთან აქვთ საქმე

საგამოძიებო კომისიის დასკვნა ინგლისურად ითარგმნება, რათა უცხოელებმა იცოდნენ, „ნაცოინალური მოძრაობის“ სახით ვისთან და რასთან აქვთ საქმე, - ამის შესახებ მმართველი გუნდის დეპუტატმა ირაკლი ქადაგიშვილმა განაცხადა.

მისი თქმით, საკონსტიტუციო სარჩელი იმ უტყუარ მტკიცებულებებზეა დამყარებული, რომლებიც საგამოძიებო კომისიის მუშაობის პერიოდში იქნა შეკრებული.

„სარჩელი, ასევე, დაფუძნებულია კონკრეტული ადამიანების ჩვენებებსა და საერთაშორისო სასამართლოების გადაწყვეტილებებზე. ჩვენს სარჩელში მყარად ვართ, დანარჩენი საკონსტიტუციო სასამართლოს გადასაწყვეტია. „ნაციონალურმა მოძრაობამ“ თქვა, რომ დავალება მიიღო. ამ დასკვნის ინგლისურად თარგმნა მიმდინარეობს, რათა უცხოელებმა იცოდნენ, ვისთან და რასთან აქვთ საქმე. მათი მხრიდან მცდელობაა, შესაგებებელი სარჩელით თავი უკეთ დაიცვან.

ამ მოცემულობას ვერავინ გაექცევა, რა უმძიმესი რეალობაც საქართველოში იყო. ამ რეალობის მემკვიდრეებმა ქვეყნის რყევა დღესაც გააგრძელეს, რადგან როცა ძირშივე იწყებ არჩევნების დისკრედიტაციას და ამ ნიადაგზე რევოლუციური პროცესების პროვოცირებას იწყებ, ბუნებრივია, ეს ანტიკონსტიტუციური ქმედებაა.

რომელი ევროპული ქვეყანა მოითმენს ამის მეათედს ან მეოცედს? ეს ყველაფერი ქვეყნის განვითარებას ხელს არ უშლის? ყველაფერი წახალისებით ხდება“, – განაცხადა ირაკლი ქადაგიშვილმა.