ნათია თურნავა: საქართველოს ბანკის ლარის ევრობონდების ემისია კიდევ ერთხელ უსვამს ხაზს საერთაშორისო ინვესტორთა მზარდ ნდობას საქართველოს საბანკო სექტორის მიმართ

საქართველოს ეროვნული ბანკის პრეზიდენტი ნათია თურნავა დადებითად აფასებს საქართველოს ბანკის მიერ 450 000 000 ლარის ნომინალური ღირებულების ევრობონდების წარმატებით გამოშვებას საერთაშორისო ბაზარზე.

„ლარის ევრობონდების ემისია კიდევ ერთხელ უსვამს ხაზს საერთაშორისო ინვესტორთა მზარდ ნდობას საქართველოს ეკონომიკის და საბანკო სექტორის მიმართ განსაკუთრებით იმ ფონზე, როცა რეგიონის გეოპოლიტიკური ვითარება გამოწვევებითა და გაურკვევლობებით ხასიათდება“, - აღნიშნა სების პრეზიდენტმა.

მისივე თქმით, ლარში დენომინირებული ევრობონდების გამოშვება ქვეყნის ფინანსური სექტორის მდგრადობისა და გრძელვადიანი სტაბილურობის განმტკიცების მიმართულებით გადადგმული მნიშვნელოვანი ნაბიჯია.

„გვჯერა, რომ ლარის ევრობონდების ემისია კარგი მაგალითი იქნება სხვა ქართული ბანკებისა და კომპანიებისთვის საერთაშორისო ინვესტორების მოზიდვის კუთხით“, - დასძინა ნათია თურნავამ.

მისივე განცხადებით, ხაზგასასმელია, რომ აღნიშნული ტრანზაქცია კვლავაც ადასტურებს საქართველოს ეროვნულ ვალუტაში ინვესტირების გაზრდილ საერთაშორისო ინტერესს, რაც უნდა აღინიშნოს, რომ სების მიერ გატარებული სწორი მონეტარული პოლიტიკისა და თანმიმდევრული დედოლარიზაციის პოლიტიკის შედეგია.

საქართველოს ბანკმა 450 000 000 ლარის ნომინალური ღირებულების ევრობონდები გამოუშვა. ტრანზაქციის მენეჯერები არიან ისეთი საერთაშორისო საინვესტიციო ბანკები როგორიცაა - Citigroup; J.P. Morgan. BCP Securities, Oppenheimer Europe, Société Générale და „გალტ & თაგარტი“. ევრობონდები ირლანდიის საფონდო ბირჟაზე განთავსდება და Moody's Investors Service Ltd-ისგან Ba2 რეიტინგს მიიღებს.