ნიკოლოზ სამხარაძე: ვერსად წაიკითხავთ, რომ საქართველოში არჩევნები გაყალბდა, ეუთოს გენერალურმა მდივანმა შარშან განაცხადა, რომ ოპოზიციამ ძალიან დააშავა, ვერ გაამართლეს ამომრჩევლის ნდობა და არ შევიდნენ პარლამენტში, რაც იყო დიდი დანაშაული

„ვერსად თქვენ ვერ წაიკითხავთ ვერც ერთ დოკუმენტში, ვერც ეუთოსი და ვერც სხვა დოკუმენტში, რომ საქართველოში არჩევნები გაყალბდა“, - ამის შესახებ პარლამენტის საგარეო ურთიერთობათა კომიტეტის თავმჯდომარემ ნიკოლოზ სამხარაძემ გადაცემა „დებატებში“ განაცხადა.

ნიკოლოზ სამხარაძის თქმით, როგორც საქართველოს დელეგაციის ხელმძღვანელს ეუთოში, არაერთ საერთაშორისო სადამკვირვებლო მისიაში აქვს მონაწილეობა მიღებული და მისივე შეფასებით, არც ერთ ოფიციალურ დოკუმენტში არ არის ნათქვამი, რომ საქართველოში არჩევნები გაყალბდა. მან ასევე აღნიშნა, რომ ეუთოს გენერალურმა მდივანმა ოპოზიციის მიერ პარლამენტში არშესვლა გააკრიტიკა და ეს გადაწყვეტილება ამომრჩევლის წინაშე პასუხისმგებლობის შეუსრულებლობად შეაფასა.

„მე ვარ საქართველოს დელეგაციის ხელმძღვანელი ეუთოში და არჩევნები არ ჩატარებულა ეუთოს სივრცეში, რომელზეც მე დამკვირვებლად არ ვყოფილიყავი წარგზავნილი და მათ შორის მისიის ხელმძღვანელიც ვიყავი, არც ერთ დოკუმენტში მე არ წამიკითხავს, რომ ეუთოს ეთქვა, რომ საქართველოში არჩევნები გაყალბდა. პირიქით, ეუთოს გენერალურმა მდივანმა, შარშან, პორტუში, როდესაც ის ესწრებოდა ყოველწლიურ სესიას, განაცხადა, რომ ოპოზიციამ ძალიან დააშავა, იმიტომ, რომ მათ ვერ გაამართლეს ამომრჩევლის ნდობა და არ შევიდნენ პარლამენტში მიუხედავად იმისა, რომ ჰქონდათ 61 მანდატი და ეს იყო ძალიან დიდი დანაშაული საკუთარი ამომრჩევლის წინაშე.

სხვათა შორის იგივე გაუმეორა ამ ჩვენს დიდებულ ოპოზიციას ამერიკის შეერთებული შტატების დელეგაციამ, რომელიც ცოტა ხნის წინ იყო ჩამოსული საქართველოში. ამიტომ, ვერსად თქვენ ვერ წაიკითხავთ ვერც ერთ დოკუმენტში, ვერც ეუთოსი და ვერც სხვა დოკუმენტში, რომ საქართველოში არჩევნები გაყალბდა, ასეთი რამ უბრალოდ ბუნებაში არ არსებობს“, - განაცხადა პარლამენტის საგარეო ურთიერთობათა კომიტეტის თავმჯდომარემ ნიკოლოზ სამხარაძემ.