2023 წლის მაისიდან, ევროკავშირის ტერიტორიაზე შესვლის წესები იცვლება

ევროკავშირში მოგზაურობის წესები იცვლება და უფასო მოგზაურობის დრო სრულდება. 2023 წლის მაისიდან ამოქმედდება ETIAS-ის სავიზო პროგრამა. თუმცა, აქვე უნდა დავაკონკრეტოთ, რომ ETIAS არ არის იგივე, რაც ვიზა. ის უფრო სწრაფია, კეთდება ონლაინ და არ საჭიროებს ბიომეტრიულ ინფორმაციას.

18 წლიდან 70 წლამდე ასაკის პირებისთვის მისი ღირებულება 7 ევრო იქნება.

ეს ცვლილება შეეხება იმ ქვეყნებს, რომელთაც ევროკავშირის ტერიტორიაზე შესასვლელად ვიზა არ სჭირდებოდა. მათ შორისაა საქართველო. არაფერი იცვლება მათთვის, ვისაც ადრეც სჭირდებოდა ვიზა კავშირში შესვლისთვის.

ევროკავშირის მიერ გამოცემული ახალი მემორანდუმის თანახმად, განაცხადის პროცესი გაივლის "ძირითადად ავტომატიზებულ IT სისტემას", რომლის დამტკიცება საჭიროებს სულ რამდენიმე წუთს განმცხადებელთა დაახლოებით 95%-სთვის. თუმცა, დამტკიცებისთვის საჭირო მაქსიმალური დრო შესაძლოა ერთ თვემდეც კი გაგრძელდეს, მაგრამ ეს მხოლოდ გამონაკლის შემთხვევებში. უარყოფითი პასუხის შემთხვევაში, გექნებათ გასაჩივრების უფლება.

ETIAS-ის ვადა 3 წელია. თუმცა, მფლობელებმა უნდა დაიცვან მიგრაციის წესები. მესამე ქვეყნის მოქალაქეებს არ შეუძლიათ ევროკავშირის ტერიტორიაზე, 180 დღის განმავლობაში 90 დღეზე მეტ ხანს გაჩერდნენ.