საბერძნეთში მღვდელმა 7 მიტროპოლიტს გოგირდმჟავა შეასხა

წარმოუდგენელი და უპრეცედენტო ინციდენტი მოხდა 23 ივნისს, პეტრაკის მონასტერში. სინოდის სასამართლო სხდომაზე, სადაც  37 წლის მსჯავრდადებულმა მღვდელმა, თეოფილაქტოს კომბოსმა მოსამართლეებს გოგირდმჟავა შეასხა, რის შედეგადაც, სხეულის სხვადასხვა ადგილებზე დამწვრობები მიიღო ათენის შვიდმა მიტროპოლიტმა, ერთმა პოლიციელმა  და სინოდის სასამართლოს მდივანმა.

დაშავებულები საავადმყოფოში გადაიყვანეს.

გავრცელებული ინფორმაციით, დაშავებული მიტროპოლიტები სინოდის სასამართლოს წარმომადგენლები იყვნენ, რომელნიც განიხილავდნენ ვერიის ეპარქიის მღვდლის საქმეს, ნარკოტიკების მოხმარების თაობაზე. 

განაჩენის გამოცხადების დროს, ბრალდებულმა გამოიღო ტანსაცმელში დამალული 2 ბოთლი, რომელშიც, როგორც გაირკვა, გოგირდმჟავა იყო მოთავსებული და მოსამართლეებს შეასხა. მღვდლები იხსენებენ, რომ მათ თავიდან სითხე ნაკურთხი წყალი ეგონათ.

როგორც მოგვიანებით გახდა ცნობილი 37 წლის ბრალდებულმა მღვდელმა უსამართლოდ მიიჩნია, სინოდის სასამართლოს მიერ მიღებული გადაწყვეტილება და უკმაყოფილება  ამ ფორმით დააფიქსირა. 

ჩადენილი საზარელი ქმედების შემდეგ, ბრალდებულმა გაქცევა სცადა, თუმცა მონასტრის დაცვის თანამშრომლებმა და ადგილზე გამოძახებულმა პოლიციელებმა ის დააკავეს.

საავადმყოფოში გადაყვანილ მიტროპოლიტებს დამწვრობები აქვთ მიღებული ხელის, ტანის და სახის არეში. 2 მათგანს აღენიშნება სერიოზული დაზიანება - ერთს სახეზე, ხოლო მეორეს კი მწველი სითხე პირდაპირ თვალის არეში მოხვდა. დანარჩენი დაზარალებულები შედარებით მსუბუქად დაშავდნენ. 

პოლიციის წყაროებიდან გავრცელებული ინფორმაციით, 37 წლის ბრალდებული მღვდელი, 2018 წლის ივნისში, 1,8 გრამი კოკაინის შენახვისთვის დააკავეს.  დაპატიმრების დროს მღვდელმა განაცხადა, რომ ნარკოტიკული ნივთიერება მას პირადი მოხმარებისთვის ჰქონდა.

საბერძნეთის ჯანდაცვის მინისტრმა, ვასილი კიკილიამ „ლაიკო" და  „კატ-ის“ საავადმყოფოები მოინახულა, სადაც სასწრაფო დახმარების ბრიგადამ დაზარალებულები გადაიყვანა.

შემთხვევიდან ცოტა ხანში, ინციდენტის დაგმობის შესახებ, განცხადება გააკეთა რესპუბლიკის პრეზიდენტმა, კატერინა საკელაროპულუმ. 

ათენისა და სრულიად საბერძნეთის მთავარეპისკოპოსთან განხორციელებულ სატელეფონო საუბარში, მომხდართან დაკავშირებით ღრმა მწუხარება გამოხატა საბერძნეთის პრემიერ მინისტრმა, კირიაკოს მიცოტაკიმ. საუბარში მან ასევე აღნიშნა რომ, თავდასხმის დროს დაზარალებულების მალე გამოსაჯანმრთელებლად სახელმწიფო მათ ყველანაირი სამედიცინო მომსახურებით უზრუნველყოფს.