იტალიაში ოჯახში ხართ დასაქმებული? - ვალდებული ხართ თან ახლდეთ ოჯახს საშობაო პერიოდში გადაადგილებისას?!

იტალიაში ოჯახში ხართ დასაქმებული? - ხართ თუ არა ვალდებული თან ახლდეთ ოჯახს საშობაო პერიოდში აგარაკზე, ზღვის სახლში, ან სხვაგან გადაადგილებისას?

შობის და საახალწლო დღესასწაულების მოახლოებასთან ერთად, სულ უფრო აქტუალური ხდება საკითხი, რა უფლება-მოვალეობები აკისრია შინამოსამსახურეს იტალიაში, ამ პერიოდში. 

შინამოსამსახურე, საჭიროების შემთხვევაში, შესაძლოა გაჰყვეს ოჯახს არდადეგების პერიოდში გადაადგილებისას, მაგრამ ვალდებული არ არის. პირველ რიგში, უნდა აღინიშნოს, რომ დამსაქმებლის მიერ შინამოსამსახურესთან ერთად გადაადგილება არ უნდა ემთხვეოდეს, დასაქმებული პირის მიერ წინასწარ მოთხოვნილ საშვებულებო პერიოდს. 

საუკეთესო ვარიანტია, თუ სამუშაო ხელშეკრულების დადების მომენტში გაიწერება ეს საკითხი, თუმცა კანონით, ამის ვალდებულება არ არსებობს. 

თუ ხელშეკრულებაში წინასწარ ჩადებულია პუნქტი, რომ შინამოსამსახურე თან უნდა გაჰყვეს ოჯახს არდადეგების პერიოდში, ამ შემთხვევაში პირის ანაზღაურება იგივე რჩება, რაც ჩვეულებრივ პერიოდში (აქ არ იგულისხმება დღესასწაულების დამატებითი ანაზღაურება). 

იმ შემთხვევაში, თუ კონტრაქტი არ ითვალისწინებს გადაადგილებას ოჯახთან ერთად და შინამოსამსახურეს მაინც უწევს გაყოლა, ანაზღაურება იზრდება და შეადგენს დღიური ანაზღაურების 20 პროცენტით მეტს.

რა თქმა უნდა, გადაადგილების და საცხოვრებლის ხარჯებს, დამსაქმებელი ოჯახი ფარავს.