წელს, ინფექციის კონტროლის კუთხით გამოვლენილი დარღვევების გამო, 59 სამედიცინო დაწესებულება 253 000 ლარით დაჯარიმდა

მიმდინარე წელს, შიდა ინფექციებზე 91 სამედიცინო დაწესებულება შემოწმდა, საიდანაც ინფექციის კონტროლის კუთხით გამოვლენილი დარღვევების გამო 59 დაწესებულება ჯამში 253 000 ლარით დაჯარიმდა.

ამის შესახებ ინფორმაციას სამედიცინო და ფარმაცევტული საქმიანობის რეგულირების სააგენტოზე დაყრდნობით საინფორმაციო სააგენტო ipn ავრცელებს:

მათივე ინფორმაციით, სასამართლოს გადაწყვეტილებით, 4 დაწესებულებას მიეცა სიტყვიერი შენიშვნა, ხოლო 28 დაწესებულების მიმართ შედგენილი ადმინისტრაციული სამართალდარღვევის ოქმის განხილვა ამ ეტაპისთვის დასრულებული არ არის.

„ნოზოკომიური ინფექციების აღრიცხვის, მართვის, ზედამხედველობისა და კონტროლის უზრუნველყოფასთან დაკავშირებული, კანონმდებლობით დადგენილი მოთხოვნების შესაბამისი, სანებართვო პირობების შემოწმება მიმდინარე წელს, პირველადად განხორციელდა 91 სამედიცინო დაწესებულებაში.

ყველა შემთხვევაში შედგა ადმინისტრაციული სამართალდარღვევის ოქმი.

მათგან სასამართლოებიდან მიღებული დადგენილებების საფუძველზე, 59 დაწესებულებას დაეკისრა ჯარიმა,(საჯარიმო სანქციამ ჯამურად შეადგინა 253 000 ლარი).

4 დაწესებულებას მიეცა სიტყვიერი შენიშვნა, ხოლო 28 დაწესებულების მიმართ შედგენილი ადმინისტრაციული სამართალდარღვევის ოქმის განხილვა ამ ეტაპისთვის დასრულებული არ არის.

იმ სამედიცინო დაწესებულებებს, რომლებსაც სასამართლოს მიერ დაეკისრათ ჯარიმა, სანებართვო პირობების გამოსწორებისთვის, ეძლევათ გონივრული ვადა.

აღნიშნული ვადის გასვლის შემდეგ, ხდება მათი განმეორებითი გადამოწმება”,- აღნიშნულია ინფორმაციაში.

რაც შეეხება სანებართვო პირობების გამოსწორებას, როგორც უწყებაში განმარტავენ, სანებართვო პირობების გამოსწორების მდგომარეობა გადამოწმდა 11 სამედიცინო დაწესებულებაში, 2 დაწესებულებაში გამოსწორდა სანებართვო პირობები, ხოლო 9 შემთხვევაში შედგა ადმინისტრაციული სამართალდარღვევის ოქმი.

„ამ ეტაპისთვის სანებართვო პირობების გამოსწორების მდგომარეობა გადამოწმდა 11 სამედიცინო დაწესებულებაში, (მათ შორის 1 დაწესებულება გადამოწმდა ორჯერ).

გადამოწმების შედეგად, 2 დაწესებულებაში გამოსწორდა სანებართვო პირობები, ხოლო 9 შემთხვევაში შედგა ადმინისტრაციული სამართალდარღვევის ოქმი.

აქედან 2 დაწესებულება დაჯარიმდა და საჯარიმო სანქციამ ჯამურად შეადგინა 27 000 ლარი.

3 დაწესებულებაში სასამართლო დადგენილების საფუძველზე საქმისწარმოება შეწყდა, ხოლო 4 დაწესებულების მიმართ შედგენილი ადმინისტრაციული სამართალდარღვევის ოქმის განხილვა სასამართლოში არ დასრულებულა”,- აღნიშნულია ინფორმაციაში.

ასევე დაგაინტერესებთ:

📍„იტალიაში ცხენის ხორცის სპეციალური მაღაზიებია, ხოლო ვირის ხორცი დელიკატესად ითვლება“ - სოციალური მედია