ზესტაფონის “ლავაცაი” და ზესტაფონური ყავის ისტორია ალეკო ელისაშვილისგან

პოლიტიკოსი ალეკო ელისაშვილი ზესტაფონისა და ყავის ისტორიით დაინტერესდა და სოციალურ ქსელში ამასთან დაკავშირებით პოსტი გამოაქვეყნა, რის გამოც ირონიული კომენტარებიც დაიმსახურა, რომ "რა კარგია როცა პარლამენტარი ამ ფაქტით ინტერესდება."

ალეკო ელისაშვილი: "ალბათ, ყველა დამეთანხმებით, რომ ბოლო წლებია, აღმოსავლეთ საქართველოდან დასავლეთში და პირიქით, მგზავრებისთვის ზესტაფონი ყავასთან და ყავით შესვენებასთან ასოცირდება.

ზესტაფონისთვის "ამერიკანო", "კაპუჩინო" და "ესპრესო" ისეთივე ბუნებრივი გახდა, როგორც ციცქა ცოლიკაური. ჰოდა, ზესტაფონის ისტორია რომ ნახოთ, ყავას კიდევ უფრო დიდი წარსული აქვს აქ.

მეოცე საუკუნის დასაწყისში, ზესტაფონში დღევანდელი ზაქარიაძის ქუჩაზე, ვაჭარ აგაბო გაჩეჩილაძის სახლში იყო ყავის ქარხანა "არგო". ქარხანა თავდაპირველად ეკუთვნოდათ პოლონელ სატოვსკის და რუს მასალკინს. ყავა მზადდებოდა სოიოსგან და რკოსგან! ქარხანა უშვებდა შეფუთულ ნაწარმს რომლებსაც ეწერათ: "არგო", "ვარდკაჭკაჭიანი", "ვარშავა", "უმაღლესი ხარისხის ყავა".

მოგვიანებით საწარმო გამოისყიდეს ძმებმა აგაბო, ბიქტორ და მიხეილ გაჩეჩილაძეებმა. ზესტაფონურ სოიოს და რკოს ყავას, საერთაშორისო პრიზები ჰქონდათ მოპოვებული. რა ვიცი, არ იქნებოდა ურიგო ამ საქმის კარგად მოკვლევა და ძველი წარმოების აღდგენა. რა ვიცი, რა ვიცი... მე უბრალოდ ფაქტი შეგახსენეთ!"