ადვოკატი: ალეკო ელისაშვილმა ქმედება ჩაიდინა პროტესტის გამოსახატავად - ერთადერთი იმას ნანობს, რომ რამდენიმე წამი დააკლდა საქმის ბოლომდე მისაყვანად

,, მან ეს ქმედება ჩაიდინა პროტესტის გამოსახატავად",- განაცხადა „ლელო- ძლიერი საქართველოს“ წევრის ალეკო ელისაშვილის ადვოკატმა გიორგი რეხვიაშვილმა ჟურნალისტებთან დიღმის იზოლატორიდან გამოსვლის შემდეგ.

როგორც ადვოკატი აცხადებს, ალეკო ელისაშვილი ნანობს, რომ საქმის ბოლომდე მისაყვანად რამდენიმე წამი დააკლდა.

„მან ეს ქმედება ჩაიდინა პროტესტის გამოსახატავად. მან პროტესტი გამოხატა უსამართლო სასამართლოს მიმართ. ერთადერთი იმას ნანობს, რომ რამდენიმე წამი დააკლდა საქმის ბოლომდე მისაყვანად. ეს არის მისგან გააზრებული პროტესტის ფორმა და მნიშვნელოვანია აღვნიშნოთ, რომ აირჩია შაბათი დღე, დილის საათები, რომ არავინ დაზიანებულიყო“, - აღნიშნა ადვოკატმა.

კითხვაზე, სცემა თუ არა ალეკო ელისაშვილმა მანდატური, ადვოკატი აცხადებს, რომ ეს ტყუილია, ალეკო ელისაშვილს მანდატური არ უცემია.

სასამართლოს კანცელარიის დაწვისა და დაზიანების ფაქტზე დაკავებული ალეკო ელისაშვილი დიღმის იზოლატორშია მოთავსებული.

შსს-ს ინფორმაციით, დაკავებულია კოალიცია „ძლიერი საქართველო - ლელოს” ერთ-ერთი ლიდერი, ალექსანდრე ელისაშვილი, რომელმაც დღეს დილით, გამთენიისას, თბილისის საქალაქო სასამართლოს კანცელარიის შენობის დაწვა სცადა.