ჭეიშვილი: საქართველოს ომში ჩათრევის საფრთხე დღის წესრიგშია - საზოგადოებას უნდა ჰქონდეს ინფორმაცია, თუ რა მზაკვრული გეგმები შეიძლება მზადდებოდეს, რა ინტერესი შეიძლება ამოძრავებდეს ევრობიუროკრატიას

 დღის წესრიგში დგას სრული სიმწვავით უკრაინაში მიმდინარე პროქსი ომში საქართველოს ჩათრევის საფრთხე, - განაცხადა იურიდიულ საკითხთა საპარლამენტო კომიტეტის თავმჯდომარის პირველმა მოადგილემ თორნიკე ჭეიშვილმა.

მისი თქმით, საზოგადოებას უნდა ჰქონდეს დეტალური ინფორმაცია იმასთან დაკავშირებით, თუ რა ინტერესი შეიძლება ამოძრავებდეს ევროპულ ბიუროკრატიას საქართველოსთან მიმართებით.

„რა თქმა უნდა, ჩვენ გვმართებს მაქსიმალური სიფხიზლე, წინდახედულობა ჩვენს საზოგადოებასთან ერთად, რომ შესაბამისი გამოწვევები, რომლებიც შეიძლება, არსებობდეს ჩვენი ქვეყნის უსაფრთხოების, მშვიდობის, სტაბილურობის შენარჩუნების კონტექსტში, თავიდან იყოს აცილებული. საზოგადოებას უნდა ჰქონდეს ძალიან დეტალური ინფორმაცია, თუ რა მზაკვრული გეგმები შეიძლება, მზადდებოდეს საქართველოსთან მიმართებით, რა ინტერესი შეიძლება ამოძრავებდეს ევროპულ ბიუროკრატიას, რომლის მხრიდანაც მომდინარე პოლიტიკურმა შანტაჟმა უკანასკნელ პერიოდში ყველანაირი რეკორდი მოხსნა. გასაგებია, რომ ამ შემთხვევაში უკვე მთელი სიმძიმის ცენტრი არის გადმოსული სწორედაც ევროპის კონტინენტზე, ბოლო არ უჩანს უკრაინაში ომის დასრულებას და რა თქმა უნდა, ამ პროქსი ომში საქართველოსაც განიხილავენ შესაბამისი გლობალური ჩრდილოვანი ძალები როგორც ერთ-ერთ პლაცდარმს, როგორც მეორე ფრონტს“, - აცხადებს ჭეიშვილი.