ლევან მაჭავარიანი ოპოზიციის მანიფესტზე: იმ ტექსტში იკითხება, რაც პირდაპირ ევრობიუროკრატებმა მისცეს - ამ შემთხვევაში შეტევა უნდა განახორციელონ დონალდ ტრამპზე

 ფრაქცია „ქართული ოცნების“ თავმჯდომარის პირველი მოადგილე ლევან მაჭავარიანი იმ მანიფესტს გამოეხმაურა, რომელიც მედიაში გავრცელებული ინფორმაციით, ბრიუსელთან იყო შეთანხმებული და რომელიც გუშინდელ აქციაზე უნდა წაეკითხათ.

მაჭავარიანის შეფასებით, მანიფესტის წაკითხვისგან ოპოზიციამ იმ მიზეზით შეიკავა თავი, რომ ისეთივე მდგომარეობაში არ აღმოჩენილიყვნენ, რომელშიც ორი კვირის წინ აღმოჩნდნენ, როცა Prime Time-მა მოიპოვა დოკუმენტი, რომელიც ადგილობრივ ოპოზიციას ბრიუსელიდან ევროკავშირის კონკრეტულმა მაღალჩინოსნებმა გამოუგზავნეს და რომელიც ოპოზიციის წარმომადგენელმა ბრიფინგზე წაიკითხა.

„მანიფესტი, რომლის წაკითხვას აპირებდნენ, კვლავ გამჟღავნდა და შესაბამისად, მათ აარიდეს თავი იმ უხერხულობას, როგორიც შეექმნათ ორი კვირის წინ. თუმცა, იმ ტექსტში იკითხება რაც პირდაპირ ევრობიუროკრატებმა მისცეს - ამ შემთხვევაში შეტევა უნდა განახორციელონ ბატონ დონალდ ტრამპზე. გვახსოვს წლების განმავლობაში რა უშვერი სიტყვებით ლანძღავდნენ ბატონ ტრამპს რადიკალური ოპოზიციის წარმომადგენლები, როგორ უწოდებდნენ მას რუსეთის აგენტს და ამ შემთხვევაშიც მანიფესტი ითვალისწინებდა ზუსტად ანალოგიურ ნარატივს, რომ თითქოს, „დიფ სთეითი“ არის ბატონი ტრამპის და „ქართული ოცნების“ მიერ გაჟღერებული ფრაზა, რომელიც დაიწერა მოსკოვში“, - განაცხადა ლევან მაჭავარიანმა.

ბრიუსელთან შეთანხმებული, ოპოზიციის მანიფესტის შესახებ მედიაში ინფორმაციის გავრცელების შემდეგ რადიკალებმა აქციაზე მანიფესტი აღარ წაიკითხეს.