ლევან მახაშვილი: ბრიუსელი უნდა შეიცვალოს, უნდა დაუბრუნდეს ღირებულებებს, რის გამოც გვიყვარდა. ასეთ შემთხვევაში იქნება შესაძლებელი საქართველოსთანაც, ამერიკასთანაც და სხვა აქტორებთანაც ცივილური ურთიერთობის აღდგენა

„სწორედ ეს ორგანიზაცია ახალისებდა მთელი ამ წლების განმავლობაში - ზოგჯერ დუმილით და ზოგჯერ აქტიური პოლიტიკური თუ ფინანსური მხარდაჭერით ძალადობას და რადიკალიზაციას. ამიტომ, მოლოდინი არ გვაქვს, რომ ისინი [ამას] გაემიჯნებიან, თუმცა ამ მოწოდებებს მომავალშიც გავავრცელებთ“, - განაცხადა ლევან მახაშვილმა ევროკავშირზე საუბრისას. ევროპასთან ინტეგრაციის კომიტეტის თავმჯდომარემ „დღის ქრონიკაში“ ასევე აღნიშნა, რომ პარტნიორებთან ურთიერთობების გასაუმჯობესებლად ბრიუსელი უნდა შეიცვალოს.

„ასევე ვხედავთ, რომ ისინი ცდილობენ ახალ-ახალი დეზინფორმაციული კამპანიები გამოიყენონ საბაბად შედარებით მძიმე გადაწყვეტილებებისთვის. მაგრამ ეს დეზინფორმაციები არის 5-6-დღიანი, ჩვეულებრივი სიყალბე. მარტივად აეხადა ყველაფერს ფარდა. როგორც არ უნდა გადმოიტანონ სიმძიმის ცენტრი საქართველოსკენ, ამ ურთიერთობის გაუარესების მთავარი მიზეზი და წყარო არის თავად ბრიუსელი. როგორც ამერიკამ უსაფრთხოების სტრატეგიაში ახსენა, თავად ბრიუსელი უნდა შეიცვალოს, უნდა დაუბრუნდეს ღირებულებებს, რის გამოც ვუწოდებდით ევროკავშირს, რის გამოც მოგვწონდა და გვიყვარდა. ასეთ შემთხვევაში იქნება შესაძლებელი საქართველოსთანაც, ამერიკასთანაც და სხვა აქტორებთანაც ნორმალური, ცივილური ურთიერთობის აღდგენა“, - განაცხადა მახაშვილმა.