შალვა პაპუაშვილი: როდესაც საქართველოს მიმართ ბრიუსელის პრეტენზიებში ვინმე სამართლიანობის რაიმე მარცვალს ეძებს, არ დაგვავიწყდეს, ეს ის ბრიუსელია, რომელმაც სააკაშვილის დემენცია გამოიგონა და დემარშებით ციხიდან მის დახსნას ცდილობდა

 როდესაც საქართველოს მიმართ ბრიუსელის პრეტენზიებში ვინმე სამართლიანობის რაიმე მარცვალს ეძებს, არ დაგვავიწყდეს, ეს ის ბრიუსელია, რომელმაც სააკაშვილის დემენცია გამოიგონა და დემარშებით ციხიდან მის დახსნას ცდილობდა, სანამ სტრასბურგის სასამართლომ, ამ აფერას, ბოლო არ მოუღო, - წერს სოციალურ ქსელში პარლამენტის თავმჯდომარე შალვა პაპუაშვილი.

იგი ევროკავშირის ელჩის, პაველ ჰერჩინსკის მიერ სააკაშვილთან დაკავშირებით წარსულში გაკეთებულ განცხადებას აზიარებს და აღნიშნავს, რომ სტრასბურგის სასამართლოს გადაწყვეტილების და მას შემდეგ, რაც „სააკაშვილი მსოფლიოში პირველი პაციენტი აღმოჩნდა, რომელიც დემენციისგან განიკურნა“, ბრიუსელის ან მისი ელჩის ბოდიში არავის მოუსმენია.

„თუმცა, სტრასბურგის სასამართლომდე იყო ბრიუსელის, თითქმის ორწლიანი თავდასხმა ქართულ სასამართლოზე, პროკურატურაზე, იუსტიციის სამინისტროზე, პარლამენტზე და მთლიანად ქართულ სახელმწიფოზე. იყო ბრიუსელის მიერ დაფინანსებული „ენჯეოების“ ყალბი სამედიცინო დასკვნები და „ხელისუფლება სააკაშვილს რუსეთის დავალებით კლავს“ კამპანიები. ზუსტად ისეთივე ყალბი და ისეთივე ბრიუსელიდან დაფინანსებული, როგორც დღეს.

მაგრამ, სტრასბურგის სასამართლოს გადაწყვეტილების შემდეგ და მას შემდეგ, რაც სააკაშვილი მსოფლიოში პირველი პაციენტი აღმოჩნდა, რომელიც დემენციისგან განიკურნა, ვინმეს ბრიუსელის ან მისი ელჩის ბოდიში მოგისმენიათ? რაიმე, სინანულის მსგავსი, რომ ცილს გვწამებდნენ? არა.

შედეგად, ბრიუსელის მაშინელი სიყალბის გატარებამ დღევანდელი სიყალბე წარმოშვა“, - წერს პაპუაშვილი.