შალვა პაპუაშვილი: საქმე საქმეზე რომ მიდგება, დონორი ხელს დაიბანს, რომელიღაც კუნძულზე ფეხს ფეხზე გადაიდებს და კოქტეილს დალევს. პასუხისმგებლობაში კი ის ადამიანები მოექცევიან, ვინც მიამიტური თვალებით უყურებენ ამ დონორებს

მტკიცებულებას მტკიცებულებაზე გვიმატებენ ჩვენი საკონსტიტუციო სარჩელისთვის მათ აკრძალვასთან დაკავშირებით. მათ შორის, განცხადება, რომ გარედან მიღებული დავალებით მიმართავენ საკონსტიტუციო სასამართლოს - ამაზე მეტი ფროიდისეული წამოცდენა რა უნდა იყოს, თვითონ აღიარეს, რომ გარედან მართული მარიონეტები არიან, - განაცხადა შალვა პაპუაშვილმა „ნაციონალური მოძრაობის“ საკონსტიტუციო სარჩელზე საუბრისას.

პარლამენტის თავმჯდომარემ აღნიშნა, რომ „ნაცმოძრაობაში“ სარჩელთან დაკავშირებული ბრიფინგის პარალელურად, „უცხოეთის დაქირავებულმა ორგანიზაციამ „საერთაშორისო გამჭვირვალობამ“ დადო პარლამენტის საგამოძიებო კომისიის მუშაობის შეფასება დადო. მისი თქმით, ეს მმართველ გუნდს აფიქრებინებს, რომ ეს ერთი პროცესის ნაწილებია.

„ხელის გულზე დევს, რომ ეს არის ორკესტრირებული ქმედება რადიკალურ ოპოზიციის, გარედან დაქირავებული „ენჯეოებისა“ და მათი დამქირავებლის მხრიდან საქართველოს წინააღმდეგ, ამ შემთხვევაში საკონსტიტუციო სასამართლოში მიმართვის გზით, სადაც ერთმანეთს ეხმარებიან ერთიანი ფრონტის შესაქმნელად“, - განაცხადა პაპუაშვილმა.

მისი შეფასებით, შიდა საქმეებზე გარე ძალებთან კონსულტაციები არ უნდა გქონდეს და ეს ვასალურ მიდგომას აჩვენებს. პაპუაშვილმა ასევე არასამთავრობო ორგანიზაციების წარმომადგენლები შესაძლო პასუხისმგებლობის შესახებ გააფრთხილა.

„დღეს დონორები მათ უბიძგებენ დანაშაულის ჩადენისკენ, კანონის დარღვევისკენ. საქმე საქმეზე და პასუხისმგებლობაზე რომ მიდგება, ის დონორი ხელს დაიბანს, წავა და რომელიღაც კუნძულზე ფეხს ფეხზე გადაიდებს და კოქტეილს დალევს. პასუხისმგებლობაში კი ის ადამიანები მოექცევიან, ვინც მიამიტური თვალებით უყურებენ ამ დონორებს და ფიქრობენ, რომ თურმე რაღაც კარგს აკეთებენ“, - აღნიშნა პაპუაშვილმა.