ყოფილი პროკურორი: კომენდანტის დროს ხშირია ქუჩური გარჩევები და ჩხუბი - პოლიცია კი სად არის?

ღამის საათებში, კომენდანტის საათის დროს მიდის ქუჩური გარჩევა და ასეთ დროს პოლიცია სად არის? სამწუხაროდ, არ არის, - ამის შესახებ  ყოფილმა პროკურორმა ზაზა დათუკიშვილმა, ტელეკომპანია „ფორმულას“ ეთერში განაცხადა.

იგი, პოლიციის უმოქმედობისკენ მიანიშნებს და ამბობს, რომ სახელმწიფოს მიდგომა ამ კუთხით არაეფექტიანია.

„რამდენიმე თვეა უკვე საქართველოში კომენდანტის საათი მოქმედებს და ღამის 3-4 საათზე უბნებში ძალიან ხშირად შეხვდებით გარჩევებს, ჩხუბს, ქუჩურ ურთიერთობებს და ა.შ. ფაქტია, რომ პოლიცია სათანადოდ არ და ვერ რეაგირებს და ამაზე ძალიან ბევრი მოქალაქისგან მომისმენია უკმაყოფილება. მძიმე ვითარებაა ქვეყანაში, ხალხს შეზღუდული აქვს ყველაფერი, მაგრამ ქუჩაში ვხედავთ, რომ ეს ქუჩური მენტალიტეტი მშვენივრად გრძნობს თავს. ღამის საათებში, კომენდანტის საათის დროს მიდის ქუჩური გარჩევა და ასეთ დროს პოლიცია სად არის? სამწუხაროდ, არ არის. არაეფექტიანია სახელმწიფოს მიდგომა ამ მიმართულებით“, - განაცხადა დათუკიშვილმა.

ყოფილმა პროკურორმა თანამდებობა  მიმდინარე წლის 22 აპრილს დატოვა.  ზაზა დათუკიშვილი ნაფიც მსაჯულთა სასამართლოს გახმაურებულ საქმეებზე იყო პროკურორი, მათ შორის სმიტების მკვლელობის საქმეზე.