„ბედნიერი ვარ და ვფიქრობ, რომ უფრო მეტი შემიძლია, კმაყოფილი არასდროს არ ვარ“ - ხვიჩა კვარაცხელია

საქართველოს ეროვნული ნაკრების წევრმა ხვიჩა კვარაცხელიამ ჩეხეთთან ფრედ დასრულებული თამაშის შემდეგ მედიის კითხვებს უპასუხა.

მან საქართველოს ნაკრების თამაში შეაფასა და აღნიშნა, რომ პორტუგალიასთან შეხვედრისთვის მაქსიმალურად მოემზადებიან.

„ძალიან დიდი მადლობა გულშემატკივრებს. ისე ვგრძნობდით თავს, თითქოს საქართველოში, საკუთარ მოედანზე ვთამაშობდით. რაც შეეხება თამაშს, გიორგი მამარდაშვილმა ძალიან მაგარი თამაში აჩვენა, ბევრჯერ გადაგვარჩინა და ალბათ, ამიტომაც არის ის საუკეთესო მეკარე.

რაც შეეხება დანარჩენს, ვფიქრობ, ჩვენც გვქონდა მომენტი. ბოლოსაც გამოჩნდა, რომ საერთოდ მოგება შეგვეძლო, მაგრამ ევროპის ჩემპიონატზე თამაშებში ვაჩვენეთ, რომ ყველაფერი შესაძლებელია ჩვენთვის, ყველა გუნდთან შეგვიძლია თამაში და სანამ 1%-იც არის შანსი, გავალთ და ვიბრძოლებთ ბოლომდე“, - განაცხადა ხვიჩა კვარაცხელიამ.

ჟურნალისტის კითხვაზე, რამდენად კმაყოფილია საკუთარი თამაშით, ხვიჩა კვარაცხელიამ აღნიშნა:

„არ ვიცი რამდენად ოპტიმალურ ფორმაში ვარ, მაგრამ რაც შემიძლია ვთქვა, ნაკრებში ყველაფერს ვაკეთებ, რასაც მავალებენ, ვცდილობ გავაკეთო იმის მიუხედავად, რომ ჩემს პოზიციაზე არ მიწევს თამაში, მაგრამ ბედნიერი ვარ და ვფიქრობ, რომ უფრო მეტი შემიძლია, კმაყოფილი არასდროს არ ვარ“, - ამბობს კვარაცხელია.