“ეს სისულელეა“ - ნაპოლის განცხადება კვარაცხელიას კონტრაქტზე

ხვიჩა კვარაცხელიას კონტრაქტთან დაკავშირებით იტალიურ მედიაში ყოველ დღე ახალი ინფორმაცია ვრცელდება. სხვადასხვა წყაროს ცნობით, ქართველი ფეხბურთელი და მისი წარმომადგენლები ხელფასის გაზრდას 5 მილიონ ევრომდე ითხოვენ, „ნაპოლი“ კი მას უფრო ნაკლებ თანხას სთავაზობს.

იტალიის მოქმედმა ჩემპიონებმა გავრცელებული ინფორმაციები უარყვეს -„ ნაპოლიმ“ სოციალურ ქსელში გაავრცელა ოფიციალური განცხადება, რომელშიც აღნიშნულია, რომ კლუბიდან კვარაცხელიასთან ამის შესახებ არავის უსაუბრია და ყველაფერი ეს "სისულელეა".

"ზოგიერთი მედია, რომლებიც წყაროებად მხოლოდ საფეხბურთო აგენტებს იყენებენ, აგრძელებენ საუბარს კვარაცხელიას კონტრაქტის შესაძლო გახანგრძლივების მოლაპარაკებებზე. ეს "სისულელეა". ნაპოლიდან მოთამაშესთან (კონტრაქტი 4 წელში ეწურება) ამაზე არავის უსაუბრია. არც მაურო მელუზოს, არც მაურიციო მიკელის, არც აურელიო დე ლაურენტისს და არც ანდრეა კიაველის", - წერია „ნაპოლის“ განცხადებაში.

ხვიჩა კვარაცხელია სანაკრებო პაუზაზე ეროვნულ გუნდთან ერთად ევროპის ჩემპიონატის შესარჩევი მატჩებისთვის ემზადება. საქართველოს ნაკრები 8 სექტემბერს სახლში ესპანეთს დაუპირისპირდება, შემდეგ კი 12 სექტემბერს სტუმრად ნორვეგიას შეხვდება.

რაც შეეხება ნაპოლის, რუდი გარსიას გუნდს 3 ტურში 6 ქულა აქვს. მომდევნო მატჩს "პარტენოპეი" 16 სექტემბერს ჯენოასთან გამართავს.

წყარო: europop.ge