„ლობჟანიძე ძალიან დამწუხრებულია და ჩვენ ვალდებულები ვართ, მხარში დავუდგეთ“ - ვილი სანიოლი

საქართველოს ეროვნული ნაკრების მწვრთნელმა ვილი სანიოლმა ჩეხეთთან ფრედ ჩატარებული მატჩი შეაფასა.

მან აღნიშნა, რომ სადებიუტო ევროპის ჩემპიონატზე ქულის აღება მნიშვნელოვანი მიღწევაა, თუმცა, მისივე თქმით, ჯერ დასრულებული არაფერია და ქართველი ფეხბურთელები პორტუგალიის წინააღმდეგ გამარჯვებისთვის იბრძოლებენ.

„პირველი 15 წუთი ფეხბურთელები გასახდელში გულდაწყვეტილები და გაბრაზებულები იყვნენ, თამაში რომ ვერ მოიგეს, შემდეგ კი გააანალიზეს, რომ საქართველოს ნაკრებს ევროპის ჩემპიონატზე ისტორიაში პირველი ქულა მოუტანეს. სანამ ევროპის ჩემპიონატზე გავიდოდით, რომ ეთქვათ ქულას აიღებო, გულდაწყვეტილები არ ვიქნებოდით, მაგრამ ახლა სხვა მოცემულობაა.

ჩეხეთს ძალიან ბევრი მომენტი ჰქონდა, მაგრამ ჩვენ ფანტასტიკური მეკარე გვყავს. გიორგი მამარდაშვილი მართლაც გამორჩეული იყო. ამ ტურნირზე ჩვენი მთავარი მიზანი გამოცდილების მიღებაა. ის მატჩი, რაც დღეს ვნახეთ იყო უმაღლესი დონე, რადგან 90 წუთი ერთ დონეზე, ერთ ტემპში მიდიოდა თამაში.

არ მინდა ვთქვა, რომ პატარა დიდის წინააღმდეგ ითამაშებს, თუმცა, ეს პორტუგალიაა და ყველაფერი ნათქვამია. გამარჯვება ურთულესი იქნება. ახლა მთავარია ძალები აღვიდგინოთ და ჯგუფის ბოლო მატჩისთვის საუკეთესოდ მოვემზადოთ. დასრულებული არაფერია. სანამ შანსი ბოლომდე არსებობს, უნდა გამოიყენო. შემადგენლობის გადახალისებას არ ვგეგმავ, რადგან პორტუგალიასთან მიზანი გამარჯვება იქნება“, - განაცხადა სანიოლმა.

მან საბა ლობჟანიძის მიერ, ბოლო წუთზე გაფუჭებულ მომენტზეც გააკეთა კომენტარი და იმედი გამოთქვა, რომ მომავალ შეხვედრაში ოთარ კიტეიშვილი ნაკრებს დაეხმარება.

„ლობჟანიძე ძალიან დამწუხრებულია და ჩვენ ვალდებულები ვართ, მხარში დავუდგეთ. მომდევნო საათებში და დღეებში მის გვერდში უნდა ვიყოთ. იმედია, კიტეიშვილი ბოლო მატჩისთვის მზად იქნება, მკურნალობის პროცესი მიმდინარეობს და ყველაფერი მალე გვეცოდინება“, - განაცხადა სანიოლმა.

შეგახსენებთ, საქართველოს ნაკრებმა ჩეხეთთან ფრედ, 1:1 ითამაშა, ხოლო 26 მაისს პორტუგალიასთან შეხვედრა ელის.