გერმანია კარანტინში მყოფ აუცრელ მუშაკებს, კომპენსაციის გადახდას შეუწყვეტს - ჯანდაცვის სამინისტროს ინიციატივა

არავაქცინირებულ მუშაკებს, რომლებიც კორონავირუსის საფრთხის გამო 2-კვირიან კარანტინში გადადიან  გერმანია კომპენსაციის გადახდას შეუწყვეტს, -  ამის შესახებ გერმანიის ჯანდაცვის მინისტრმა იენს სპანმა განაცხადა.

ინფორმაციას Reuters-ი ავრცელებს.

როგორც ჯანდაცვის მინისტრმა პრესკონფერენციაზე განაცხადა, გერმანიის მოქალაქეები, "მაღალი რისკის" ქვეყნებში მოგზაურობიდან დაბრუნების შემდეგ (ბრიტანეთი, თურქეთი და საფრანგეთი) 5-დღიანი კარანტინის რეჟიმს ექვემდებარებიან და ამის გამო დამსაქმებელი იძულებულია მათ კომპენსაცია გადაუხადოს, რაც მისი თქმით ბიზნესს დააზარალებს.

"წესები, რომელსაც გერმანიის 16 ფედერალური შტატის მთავრობები განახორციელებენ, ძალაში შევა არაუგვიანეს 11 ოქტომბრისა. ჩვენ ეს შეზღუდვა სხვანაირად უნდა დავინახოთ, ეს ეხება სამართლიანობას. მათ, ვინც თავს და სხვებს იცავს ვაქცინაციის საშუალებით, შეუძლიათ სამართლიანად იკითხონ, რატომ უნდა გადავუხადოთ მათ, ვინც კარანტინში აღმოჩნდა რისკის ზონაში დასვენების შემდეგ", - აღნიშნა ჯანდაცვის მინისტრმა პრესკონფერენციაზე.

გერმანიაში ვაქცინაცია სავალდებულო არ არის, თუმცა ასეთი ინიციატივის გამო ჯანდაცვის მინისტრი უკვე გააკრიტიკეს.

კრიტიკოსებმა განაცხადეს, რომ ბევრ მუშაკს არ აქვს საშუალება დარჩეს სახლში ანაზღაურების გარეშე, და ხელისუფლების მსგავსი ზომები, კიდევ უფრო არა პოპულარულს გახდის ვაქცინაციას.

ცნობისთვის, გერმანიას აქვს მკაცრი კანონები, რომლებიც მოქალაქის პერსონალური მონაცემების კონფიდენციალურობას არეგულირებს  და დამსაქმებლებს, როგორც წესი, არ აქვთ უფლება ჰკითხონ პერსონალს ინფორმაცია ჯანმრთელობის საკითხებთან დაკავშირებით.

გერმანიაში სრულად აცრილია მოზრდილთა 74%-ი, ხოლო მთლიან ევროკავშირში 72,3%-ი.