ტრამპმა ზელენსკისთან შეხვედრა ბოლო მომენტში გააუქმა, მაგრამ მაკრონი ჩაერია და გადააფიქრებინა - ფრანგული მედია

ამერიკის შეერთებულ შტატებს სურდა, უკრაინის პრეზიდენტის ვოლოდიმირ ზელენსკის ვიზიტი ვაშინგტონში გაეუქმებინა, მაგრამ პარიზის ჩარევის შემდეგ გადაიფიქრა. ამის შესახებ ტელეკომპანია BFMTV ფრანგულ დიპლომატიურ წყაროზე დაყრდნობით იტყობინება.

მედიის ცნობით, გუშინ თეთრმა სახლმა უკრაინის ლიდერს სთხოვა, არ ჩასულიყო შეერთებულ შტატებში პრეზიდენტ დონალდ ტრამპთან შესახვედრად.

„ვოლოდიმირ ზელენსკიმ დაურეკა ემანუელ მაკრონს, რომელიც თავის მხრივ დაუკავშირდა დონალდ ტრამპს, სთხოვა, მიეღო მისი კოლეგა და დაამატა, რომ მისთვის გარანტიას იძლეოდა. დონალდ ტრამპი საბოლოოდ დათანხმდა და ოთხშაბათს [26 თებერვალს] გამოაცხადა, რომ უკრაინის ლიდერს თეთრ სახლში მიიღებს“, - განაცხადა წყარომ.

როგორც ცნობილია, უკრაინის პრეზიდენტის ოფიციალური ვიზიტი ამერიკის შეერთებულ შტატებში პარასკევს, 28 თებერვალს, არის დაგეგმილი. შეხვედრის მთავარი მიზანი აშშ-ის პრეზიდენტ დონალდ ტრამპთან იშვიათი მიწის მინერალების მოპოვების სფეროში თანამშრომლობის შესახებ წინასწარი შეთანხმების გაფორმებაა.

შეერთებულ შტატებში ვიზიტის დროს მინერალების შესახებ შეთანხმების ხელმოწერის გარდა, ზელენსკი ტრამპთან უსაფრთხოების გარანტიების საკითხებს და უკრაინის შემდგომ მხარდაჭერას განიხილავს.