დავით მათიკაშვილი ოპოზიციაში დაპირისპირებაზე: საქართველოს სიძულვილში გაერთიანებული ადამიანები ერთმანეთს არ ინდობენ, წარმოიდგინეთ, რაღაც ფორმით ეს ძალა რომ ქვეყნის ხელისუფლებაში დაბრუნდეს, რა დღეში ჩააგდებენ საქართველოს

საქართველოს სიძულვილში გაერთიანებული ადამიანები ერთმანეთს არ ინდობენ. ბავშვის ფოტოების გამომზეურებაც შეუძლიათ და შემდეგ ბოდიშის მოხდა, რაც ამ ყველაფერს ვერ უწამლებს, ეს გამოსავალი ვერ იქნება, - განაცხადა პარლამენტის საპროცედურო საკითხთა კომიტეტის თავმჯდომარე დავით მათიკაშვილმა.

ამ კომენტარით უმრავლესობის დეპუტატი გამოეხმაურა თამარ ჩერგოლეიშვილთან დაკავშირებულ სკანდალს, რამაც ოპოზიციაში დაპირისპირება გამოიწვია.

„ერთმანეთში დაპირისპირება რადიკალებისა და კოლექტიური „ნაცმოძრაობის“ სახეა. მინდა, საზოგადოებას მივმართო, უბრალოდ, წარმოიდგინეთ, რაღაც ფორმით ეს ძალა რომ ქვეყნის ხელისუფლებაში დაბრუნდეს, რა დღეში ჩააგდებენ საქართველოს, ქართველ ხალხს. როდესაც ვსაუბრობთ კოლექტიურ „ნაცმოძრაობაზე“, ბოკუჩავებზე, სააკაშვილებზე, ჩერგოლეიშვილებზე, საბოლოო ჯამში, ისინი გარე ძალებიდან დაფინანსებულ ერთ მთლიან რადიკალიზმს წარმოადგენენ. მათ გამარჯვებას რომ არანაირი წარმატება არ უწერია, ეს ყველაფერი საზოგადოების მხრიდან 4 ოქტომბერს კიდევ ერთხელ გაცხადდება“, - განაცხადა მათიკაშვილმა.

თამარ ჩერგოლეიშვილთან დაკავშირებული სკანდალი ოპოზიციაში მორიგი დაპირისპირებისა და შიდა განხეთქილების მიზეზი გახდა. „ნაციონალური მოძრაობის“ თავმჯდომარე თინა ბოკუჩავა, რვა პარტიის ფორმატში მყოფ პარტიებს მიმართავს, თამარ ჩერგოლეიშვილთან ურთიერთობის დასრულების შესახებ გადაწყვეტილება მიიღონ.

პარტია „ფედერალისტების" ლიდერმა თამარ ჩერგოლეიშვილმა „ფეისბუქზე" კომენტარებში მის მიმართ შეურაცხმყოფელი კომენტარების ავტორებს მათივე „ფეისბუქის" პროფილიდან აღებული მცირეწლოვანი ბავშვების ფოტოების გამოყენებით უპასუხა. აღნიშნულს როგორც ოპოზიციონერების, ისე საზოგადოების მხრიდან „ფედერალისტების“ ლიდერის კრიტიკა მოჰყვა.