ვილი სანიოლი - თურქეთი ძლიერი გუნდია, მაგრამ ვფიქრობ, შეგვიძლია, რომ ჩვენს მიზანს მივაღწიოთ

მსოფლიო ჩემპიონატის ახალი შესარჩევი ციკლის დაწყებამდე საქართველოს ნაკრების მთავარმა მწვრთნელმა, ვილი სანიოლმა სასტუმრო „პარაგრაფში“ პრესკონფერენცია გამართა და თურქეთსა და ბულგარეთთან მოახლოებულ შეხვედრებზე ისაუბრა.

„თურქეთი ძლიერი და ამბიციური გუნდია, მაგრამ ვფიქრობ, გვაქვს პოტენციალი, დასახულ მიზნებს მივაღწიოთ. სექტემბერში რთულია თამაში, რადგან სეზონი ახალი დაწყებულია, მაგრამ იმედი მაქვს, რომ წარმატებას მივაღწევთ.

დავაბრუნებ თუ არა სამმცველიან ტაქტიკას? ჩემთვის უფრო მნიშვნელოვანია, მოთამაშეებმა დავალებები შეასრულონ. ტაქტიკური სქემა იმაზე იქნება დამოკიდებული, დაცვის სისტემასთან დაკავშირებით რა გადაწყვეტილებას მივიღებთ.

ნაკრებში მოსვლის შემდეგ ვცდილობთ, გუნდში ახალგაზრდების ინტეგრაცია მოხდეს, ამჯერადაც ორი დებიუტანტი გვყავს – გიორგი აბუაშვილი და ნოდარ ლომინაძე. არიან სხვა საინტერესო მოთამაშებიც – გიორგი კვერნაძე და ნიკა გაგნიძე. თაობათა ცვლა და გუნდის გადახალისება ბუნებრივი პროცესია“.

2026 წლის მსოფლიო ჩემპიონატის შესარჩევი ჯგუფის საწყის ორ მატჩს საქართელოს ნაკრები თბილისში გამართავს – 4 სექტემბერს თურქეთს უმასპინძლებს, ხოლო 7-ში – ბულგარეთს, ორივე შეხვედრა „დინამო არენაზე“ გაიმართება, პირდაპირ ტელერეპორტაჟებს საქართველოს პირველი არხი და პირველი არხი სპორტი შემოგთავაზებთ.