გია ვოლსკი: მოთხოვნები, რაც ჩვენ წინაშე დააყენეს იმისთვის, რომ ევროინტეგრაციის გზა გაგრძელებულიყო, შეუსაბამოა იმ რეალობასთან, რომელიც საქართველოში არსებობს

„მოთხოვნები, რაც ჩვენ წინაშე დააყენეს იმისთვის, რათა ევროინტეგრაციის გზა გაგრძელებულიყო, შეუსაბამოა იმ რეალობასთან, რომელიც საქართველოში არსებობს“, - განაცხადა გადაცემაში „იმედი LIVE“ საქართველოს პარლამენტის პირველმა ვიცე-სპიკერმა გია ვოლსკიმ.

„ეს არის ტრადიცია, ოჯახი, თუნდაც ბავშვების უფლებების დაცვა. ვუხსნით, რომ ჩვენთვის არ არის პრობლემა ამ ფორმის უმცირესობისადმი ვიყოთ ლოიალური, სახელმწიფოში კანონია მიღებული, რომ ნებისმიერი ადამიანი კანონის წინაშე ერთნაირად პასუხისმგებელია. სტიგმატიზაციას არ ვახდენთ.

ჰერჩინკსი გამოვიდა და თქვა, რომ საქართველოს ევროპის გზაზე უარი აქვს ნათქვამი, რაც სიცრუეა. შემდეგ იყო - საქართველო მოგვმართავს, როგორც წესი ითვალისწინებს და ჩვენ უარი ვუთხრათ, რადგან ჩემს ნათქვამზე ხალხი არ აღელდა და მოდით, ახლა ამ გზით წავიდეთო. თუმცა ირაკლი კობახიძემ ძალიან ნათლად უთხრა, რომ ჩვენ ხვალვე მზად ვართ ნებისმიერ თემაზე დავიწყოთ მოლაპარაკება, მაგრამ არ მოგმართავთ, რადგან არ მივიღოთ წინასწარ [უარი] რაც ჩაფიქრებული გაქვთ“, - აღნიშნა ვოლსკიმ.

გია ვოლსკი გამოეხმაურა ოპოზიციის რიგებიდან ბოლო პერიოდში აფხაზეთთან დაკავშირებით გაკეთებულ განცხადებებსაც.

„შეიძლება ნიკა გვარამია თავის თავს რეკლამას უკეთებს, ინტრიგა შემოაქვს, მაგრამ ეს თემა ადრეც იდგა, ტერიტორიებზე უარი ვთქვათ, მეორე დღეს ნატოში მიგვიღებენ - არ არსებობს ასეთი რამ. აგერ უკრაინა სისხლში იხრჩობა, მაგრამ უთხრეს, რომ არათუ ნატოში, ევროკავშირში რომ შემოხვიდეთ, არის ვარიანტი, მაგრამ ხმის ამოღების უფლებაც არ გექნებათო.

შემოაქვთ უტოპიური თემა, რომელსაც აძლევენ ისეთ სკანდალურ ფორმულირებას, რომელმაც უნდა გამოიწვიოს ახალი დაპირისპირება. იქ აფხაზეთში უკვე გამოჩნდნენ ჯგუფები, რომლებიც ამბობენ, აი ხომ ვამბობდით - მართალს ამბობს ბარამიძე და იმიტომ დაიჭირესო. ეს აწყობს ყველა მხარეს, რუსეთსაც.

ბარამიძის მესიჯი გაცილებით მძიმეა, რასაც გვარამიამ უჭკუობა დაარქვა. გვაქვს გამოცდილება ამ ადამიანების პროვოკაციებისადმი მიდრეკილების და არ გვაქვს უფლება დავუშვათ, რომ ეს ჩვეულებრივი ნათქვამია“, - აღნიშნა ვოლსკიმ.