გლდანის რაიონის გამგეობამ 6 თვის განმავლობაში 7 142 787 ლარის ღირებულების ინფრასტრუქტურული პროექტები განახორციელა

გლდანის რაიონის გამგეობამ მიმდინარე წლის დასაწყისიდან სხვადასხვა მნიშვნელოვანი ინფრასტრუქტურული პროექტი განახორციელა, რისთვისაც ადგილობრივი ბიუჯეტიდან 7 142 787 ლარი დაიხარჯა.

გასული 6 თვის განმავლობაში მოეწყო და რეაბილიტაცია ჩაუტარდა სკვერებს, სპორტულ მოედნებს, მოეწყო და განახლდა გზის საფარი.

კერძოდ, საგზაო ინფრასტრუქტურა 48 102 კვ.მეტრ ფართობზე მოწესრიგდა. სხვადასხვა სახის კეთილმოწყობის პროექტები 35 მისამართზე განხორციელდა. სამ მისამართზე მოეწყო სკვერი, გამგეობის „ბინათმესაკუთრეთა ამხანაგობის განვითარების ხელშეწყობის პროგრამის“ ფარგლებში განხორციელდა 70 პროექტი.

„ჩვენთვის უმნიშვნელოვანესია მოსახლეობაზე მორგებული პროექტების განხორციელება და იმ პრობლემების აღმოფხვრა, რაც მოქალაქეებს აწუხებთ. სწორედ ამიტომ, გამგეობისთვის პრიორიტეტულია როგორც ინფრასტრუქტურის მოწესრიგება, ასევე, სოციალური და კულტურული პროექტების განხორციელება. წელს, ექვსი თვის განმავლობაში გამგეობამ არაერთ ქუჩაზე მოაწესრიგა საგზაო ინფრასტრუქტურა, შექმნა მწვანე სივრცეები, ასევე, დემონტაჟი ჩავუტარეთ ავტოფარეხებს და მათ ნაცვლად სკვერები მოვაწყვეთ. გამგეობის კიდევ ერთი მნიშვნელოვანი მიმართულებაა ბინათმესაკუთრეთა ამხანაგობების ხელშეწყობა. წელს, კიდევ ბევრი მნიშვნელოვანი და საინტერესო პროექტი გვაქვს როგორც მიმდინარე, ასევე, დაგეგმილი“, - აღნიშნა გლდანის რაიონის გამგებელმა ბესიკ კალაძემ ერთ-ერთი დასრულებული პროექტის დათვალიერებისას.