ლევან მახაშვილი: ევროსაბჭოს საპარლამენტო ასამბლეისგან განსხვავებით, არის პლატფორმები, სადაც საღად აფასებენ მოვლენებს, ეს მაძლევს იმედს, რომ იდეოლოგიურად მოტივირებული დეპუტატების განცხადებას რეალური შედეგები არ ექნება

„ღიმილის მომგვრელია, როდესაც ის ადამიანები აკეთებენ მსგავსი ტიპის შეფასებებს, რომლებიც გასული საპარლამენტო არჩევნების დღეებში და მომდევნო პერიოდებში პირდაპირ იყვნენ ჩართულნი არჩევნების და ხელისუფლების გაშავებაში, საქართველოს იმიჯის დაზიანებაში და საერთაშორისო არენაზე საქართველოს რეპუტაციის მაქსიმალურად დაზიანებაში“, – ამის შესახებ „ქართული ოცნების“ წევრმა ლევან მახაშვილმა ევროსაბჭოს რეზოლუციაზე საუბრისას განაცხადა.

მისი თქმით, სასურველია, რომ ევროსაბჭოში ფაქტებით და რეალური ინფორმაციით ისაუბრონ.

„რაც უფრო მოახლოვდება არჩევნები, მით უფრო ცხელი შეფასებები გვექნება. ეს ახალი სცენარი არ არის, ეს ის სცენარია, რაც წინა საპარლამენტო არჩევნების დღეს ვნახეთ. როგორც ჩანს, ზაფხულის ცხელი დღეებიდან საღათას ძილით გამოიღვიძეს ჩვენმა ოპოზიციონერებმა და იმის ნაცვლად, რომ მოსახლეობას ელაპარაკონ, დაიწყეს მათი უცხოელი მფარველებისგან მსგავსი განცხადებების გაკეთება. ამ ადამიანებს აქვთ დადასტურებული გზა და ისტორია იმის, თუ როგორ აზიანებდნენ, აშავებდნენ და დარტყმებს აყენებდნენ საქართველოს, მათ შორის არჩევნების დროს და ზოგადად, პოლიტიკურ პროცესში. ჩვენ მზად ვართ, ნებისმიერთან საპარლამენტო ასამბლეის ფორმატში იქნება, ევროპის საბჭოს მინისტრთა კომიტეტის ფორმატში თუ სხვა ფორმატში ნებისმიერი საკითხი განვიხილოთ, რომელიც შეიძლება მათ აღელვებდეთ.

მათი მთავარი მიზანი ამ მომენტში არის საქართველოს დაზიანება მოკლევადიანად მოახდინონ და ამით წაეშველონ ადგილობრივ რადიკალურ ოპოზიციას. ევროსაბჭოს საპარლამენტო ასამბლეისგან განსხვავებით, არის სხვა პლატფორმები, სადაც რეალურად საღად აფასებენ ამა თუ იმ მოვლენას და პროცესებს. სწორედ, ეს მაძლევს იმის იმედს, რომ ამ იდეოლოგიურად მოტივირებული რამდენიმე დეპუტატის განცხადებას რეალური შედეგები არ ექნება“, – განაცხადა მახაშვილმა.