გიორგი ვოლსკი: შემოვიდა დაპირისპირების, ლანძღვის და ზიზღის ისეთი ფორმები, რომლებიც არც საქართველოს კულტურას, არც მის ისტორიას არ ახასიათებს და მის მომავალს სერიოზულ საფრთხეს უქმნის

მმართველი გუნდის შეფასებით რეზოლუცია, რომელიც ევროპარლამენტმა მიიღო უსამართლოა და საქართველოს მიმართ გარე ძალების დამოკიდებულებას ასახავს. პარლამენტის პირველი ვიცე-სპიკერის, გიორგი ვოლსკის აზრით,

„შემოვიდა დაპირისპირების, ლანძღვის და ზიზღის ისეთი ფორმები, რომლებიც არც საქართველოს კულტურას, არც მის ისტორიას არ ახასიათებს და მის მომავალს სერიოზულ საფრთხეს უქმნის. ამ საკითხებზე აქვს დღეს მსჯელობა ევროკავშირის აი ამ სტრუქტურას და ფიქრობენ, რომ მათთვისაც საშიშია ეს. მაგრამ რაც მათთვის საშიშია, მათთვის ნორმალური აღმოჩნდა საქართველოში. ამას ხელს უწყობენ, პოლიტიკურად ახალისებენ და ფინანსურად სერიოზულად ამარაგებენ სწორედ ამ სცენარს, რასაც ზიზღის ენისა და ექსტრემიზმის მხარდაჭერა ჰქვია“, - აცხადებს ვოლსკი.

რეზოლუციაში საუბარია სანქციებზე და დაკავებულების გათავისუფლებაზე. რეზოლუციის მხარდამჭერი ევროდეპუტატები ითხოვენ მზია ამაღლობელის დაუყოვნებლივ და უპირობო გათავისუფლებას. დოკუმენტში წერია, რომ მზია ამაღლობელი კორუფციის გამოვლენისა და 2024 წლის არჩევნების დროს არჩევნების გაყალბების შესახებ ინფორმაციის გავრცელებისთვის ისჯება. ევროპარლამენტში რეზოლუციის მეორე პროექტიც იყო დარეგისტრირებული, სადაც ევროკავშირს მოუწოდებდნენ საქართველოს მიმართ მიდგომები შეცვალოს და არ ჩაერიოს ქვეყნის საქმეებში.