მაია ბითაძე საგამოძიებო კომისიაზე: ეს იქნება პრევენციული მექანიზმი იმისთვის, რომ საქართველოში ანტისახელმწიფოებრივი ქმედებები არავინ აღარასოდეს გაბედოს

ძალიან მნიშვნელოვანი გადაწყვეტილება მიიღო საქართველოს პარლამენტმა და იმედი მაქვს, შემდგომი ეტაპი იქნება სარჩელის შემდგომი განხილვები, სადაც ნათელი მოეფინება იმ მავნებლობას და სახელმწიფო დანაშაულებს, რასაც „ნაციონალური მოძრაობა“ მმართველობის დროს ატარებდა“, - განაცხადა „დღის ქრონიკაში“ გარემოს დაცვისა და ბუნებრივი რესურსების კომიტეტის თავმჯდომარემ, მაია ბითაძემ პარლამენტის დროებითი საგამოძიებო კომისიაზე საუბრისას.

როგორც ბითაძემ აღნიშნა, საგამოძიებო კომისიამ რამდენიმე თვე იმუშავა, მომზადდა დოკუმენტი და დღეს პარლამენტმა დადგენილენა დაამტკიცა.

„დადგენილებაში პრაქტიკულად თავი არის მოყრილი ყველა იმ დანაშაულებრივი ქმედებებისთვის, რასაც „ნაციონალური მოძრაობა“ ახორციელებდა როგორც საკუთარი ძალით, ასევე მისი სატელიტების მეშვეობით, უკვე მმართველობის დასრულების შემდეგ.

ადამიანის უფლებების შეზღუდვა, მედია თავისუფლების შეზღუდვა, ეკონომიკური დანაშაულები და ასევე დანაშაული სამშობლოს წინააღმდეგ, რამაც გამოიწვია ჩვენი ოკუპირებული ტერიტორიების საბოლოო ოკუპაცია რუსეთის მხრიდან, ეს არის დანაშაულების ნაკრები, რომელიც აისახა საგამოძიებო კომისიის დასკვნაში, რაზეც მომზადება სარჩელი და საკონსტიტუციო სასამართლოს წარედგინება.

ეს იქნება პრევენციული მექანიზმი იმისთვის, რომ საქართველოში არავინ აღარასოდეს გაბედოს ანტისახელმწიფოებრივი ქმედებები. სამწუხაროდ, ბოლო წლების განმავლობაში, განსაკუთრებით გარე ჩარევებიდან გამომდინარე, ჩვენი რადიკალები ცდილობდნენ, რომ მეხსიერებიდან წაეშალათ 9-წლიანი მმართველობა, ქილიკის საგნადაც გადააქციეს იმ ადამიანების ტრაგედია“, - აღნიშნა მაია ბითაძემ.

პარლამენტმა 85 ხმით, „2003-2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელი საქართველოს პარლამენტის დროებითი საგამოძიებო კომისიის საქმიანობის შედეგების შესახებ“ დადგენილება მიიღო.