„კვარაცხელიას „ნაპოლისთან“ კონტრაქტის გაგრძელება არ სურს, რადგან „ბარსელონა“ იწვევს“ - Gazetta dello Sport

„ნაპოლის“ ვარსკვლავი, ხვიჩა კვარაცხელია კლუბთან კონტრაქტის განახლებაზე უარს ამბობს, „ბარსელონა“ ვითარებას აკვირდება. ქართველმა ვარსკვლავმა, შესაძლოა, კლუბი მიმდინარე სეზონის დასრულების შემდეგ დატოვოს – ინფორმაციას Gazzetta dello Sport ავრცელებს.

„მას შემდეგ, რაც „ბარსელონას“ მთავარ მწვრთნელად ჩავი ერნანდესის დარჩენა გადაწყდა, „ბარსელონა“ უნდა შეეცადოს, მწვრთნელს კონკურენტუნარიანი შემადგენლობა შესთავაზოს. „ბლაუგრანას“ დღის წესრიგში ცენტრალური ნახევარმცველისა და ბერნარდო სილვას დამატების გარდა, ახალი მარცხენა გარემარბის შეძენაც შედის. ამ პოზიციაზე კატალონიელებს „ნაპოლის“ თავდამსხმელის, ხვიჩა კვარაცხელიას შეძენა სურთ. ქართველი ფეხბურთელი „ბარსას“ ხელმძღვანელობას ძალიან მოსწონს, კლუბი მას აღიქვამს ფეხბურთელად, რომელსაც შეუძლია მეტოქეებს მარცხენა ფლანგიდან დიდი საფრთხეები შეუქმნას.

კვარაცხელიას აგენტი, მამუკა ჯუღელი ახალი კონტრაქტის პირობებზე მოსალაპარაკებლად კლუბის პრეზიდენტს, აურელიო დე ლაურენტის უნდა შეხვდეს. „ნაპოლი“ მზად არის, ფეხბურთლის ხელფასი წელიწადში 1,5 მილიონიდან 4 მილიონ ევრომდე გაზარდოს, მაგრამ გარემარბს ახალი კონტრაქტის გაფორმება არ სურს და „ბარსელონაში“ გადასვლის პერსპექტივა მოსწონს. კატალონიელებისთვის, შესაძლოა, დაბრკოლება გახდეს ფინანსური მდგომარეობა, რადგან კვარაცხელიას „ნაპოლისთან“ კონტრაქტი 2027 წლამდე აქვს გაფორმებული“, – წერს Gazetta dello Sport.