ზურაბ ხიზანიშვილი: ოქტომბერში ურთულესი მატჩები გველის. ჯგუფში მეორე ადგილზე გასვლა ჩვენთვის დიდი წარმატება იქნება

თურქეთთან და ბულგარეთთან ორი განსხვავებული მატჩი ჩავატარეთ. ბიჭებმა მოახერხეს ძალების აღდგენა და შეცდომების გამოსწორება. მადლობა ყველა ფეხბურთელს, განსაკუთრებით კი გიორგი მამარდაშვილს, რომელმაც პირველივე წუთებზე ურთულესი ბურთი მოიგერია, - განაცხადა საქართველოს ნაკრების მთავარი მწვრთნელის, ვილი სანიოლის ასისტენტმა, ზურაბ ხიზანიშვილმა.

მან ბულგარეთთან მოგებული მატჩი შეაფასა.

„პირველ რიგში, გილოცავთ საქართველოს კალათბურთელთა და ფეხბურთელთა ნაკრებების, გამარჯვებას.

კაშიას რაც შეეხება, დიდი პატივისცემა გურამს. სანიოლი ესაუბრა მას და მწვრთნელმა პროფესიონალური გადაწყვეტილება მიიღო, რაც ჩვეულებრივი ამბავია.

დებიუტანტებმა კარგად ითამაშეს. ლომინაძეს ძალიან დიდი პოტენციალი აქვს. გამოვიძახეთ და ძალიან კმაყოფილები დავრჩით. გოგლიჩიძეზე იგივე შემიძლაი ვთქვა, რაც ლომინაძეზე. საბა სწრაფი და აქტიური ფეხბურთელია, სერია A-ში თამაშობს, რომელიც მსოფლიოში ერთ-ერთი საუკეთესო ლიგაა. ის იქნება მცველი, ვინც ნაკრებში წლების განმავლობაში ითამაშებს.

ოქტომბერში ესპანეთსა და თურქეთში ორი რთული თამაში გველის. ჯგუფიდან გასვლის შანსები ჯერ ისევ არის და ვეცდებით, მაქსიმალურად გამოვიყენოთ.

კაშია გუნდის კაპიტანია, ამავე დროს, გადავწყვიტეთ, რომ კვარაცხელია, კიტეიშვილი და კაკაბაძე ვიცე-კაპიტნები იქნებიან. დღევანდელ თამაშში გადავწყვიტეთ, კაპიტნობა ხვიჩასთვის მიგვენდო. ის მოედანზე გუნდის ლიდერია, მაგრამ ჩემთვის არ აქვს გადამწყვეტი მნიშვნელობა, ვინ იქნება კაპიტანი.

ოქტომბერში ურთულესი მატჩები გველის. გვსურს, ყველასთან თანაბრად ვითამაშოთ. თურქეთთან კი რაც დაგვაკლდა, ეს სწრაფი თამაში იყო და ამის გამო დავმარცხდით. რეალობიდან გამომდინარე, ჯგუფში მეორე ადგილზე გასვლა ჩვენთვის დიდი წარმატება იქნება“, - განაცხადა ზურაბ ხიზანიშვილმა.

2026 წლის მსოფლიო ჩემპიონატის საკვალიფიკაციო ჯგუფური ეტაპის მეორე შეხვედრა „დინამო არენაზე“ საქართველოს ეროვნული ნაკრების გამარჯვებით, ანგარიშით 3:0 დასრულდა.