ისრაელის საგარეო საქმეთა მინისტრი: მაკრონი თავისი ქმედებებით ძირს უთხრის რეგიონის სტაბილურობას - მისი ქმედებები სახიფათოა

„მაკრონი თავისი ქმედებებით ძირს უთხრის რეგიონის სტაბილურობას და რეგიონულ და საერთაშორისო სისტემას ცალმხრივი ნაბიჯებისკენ უბიძგებს“, - განაცხადა ისრაელის საგარეო საქმეთა მინისტრმა, გიდეონ საარმა.

„პრეზიდენტ მაკრონს ძალიან აინტერესებს აშშ-ში პალესტინის ადმინისტრაციის ოფიციალური პირებისთვის ვიზების გაცემის საკითხი. სწორედ ეს არ აძინებს მას ღამით. ის არ აპროტესტებს პალესტინის განათლების სისტემაში ისრაელისა და ებრაელების წინააღმდეგ გაჩაღებულ აშკარა წაქეზებას. ის ასევე არ აპროტესტებს იმ გადასახადებს, რომლებსაც პალესტინის ადმინისტრაცია „მოკალი და მიიღე გასამრჯელო“ მეთოდით ურიცხავს ტერორისტებსა და მათ ოჯახებს. ტერორისტული აქტი რაც უფრო მძიმეა, მით უფრო მაღალია პალესტინის ადმინისტრაციის მიერ გაცემული ჯილდო“, - აღნიშნა ისრაელის საგარეო უწყების ხელმძღვანელმა.

„მაკრონი გარედან ცდილობს ჩაერიოს კონფლიქტში, რომლის მხარეც თავად არ არის, ისე, რომ მისი ქმედებები სრულად მოწყვეტილია 7 ოქტომბრის შემდეგ შექმნილ რეალობას. მაკრონი თავისი ქმედებებით ძირს უთხრის რეგიონის სტაბილურობას და რეგიონულ და საერთაშორისო სისტემას ცალმხრივი ნაბიჯებისკენ უბიძგებს. მისი ქმედებები სახიფათოა. ეს არ მოიტანს არც მშვიდობას და არც უსაფრთხოებას“, - დასძინა მან.