რუბიო აცხადებს, რომ ისრაელსა და ლიბანს შორის სამუდამო სამშვიდობო შეთანხმება მიღწევადია, თუმცა რთული

აშშ-ის სახელმწიფო მდივანი მარკო რუბიო აცხადებს, რომ ისრაელსა და ლიბანს შორის სამშვიდობო შეთანხმების მიღწევა შესაძლებელია, თუმცა ეს პროცესი ადვილი არ იქნება და ლიბანისგან „ჰეზბოლას“ წინააღმდეგ ბრძოლაში შესაძლებლობების გაძლიერებას მოითხოვს.

„ვფიქრობ, ლიბანსა და ისრაელს შორის სამშვიდობო შეთანხმების მიღწევა აბსოლუტურად შესაძლებელია და ასეც უნდა იყოს. ისრაელსა და ლიბანს შორის პრობლემა არა ისრაელი, ან ლიბანი, არამედ „ჰეზბოლაა“, - განაცხადა რუბიომ თეთრ სახლში გამართულ ბრიფინგზე.

„ეს ძალიან დიდი ხანია, გრძელდება. რა არის ჩვენი იმედი? ჩვენი იმედია, რომ ლიბანისა და ისრაელის მთავრობები ჩვენი შუამავლობით მოლაპარაკებების მაგიდასთან მივიყვანოთ ამის მისაღწევად და ეს ნიშნავს ლიბანის შეიარაღებული ძალებისა და ლიბანის მთავრობის არსებობას, რომელსაც ექნება არა მხოლოდ სურვილი, არამედ შესაძლებლობა, დაიწყოს „ჰეზბოლას“ გამოწვევა და განიარაღება“, - აღნიშნა სახელმწიფო მდივანმა.

ტრამპმა ისრაელსა და ლიბანს შორის ცეცხლის შეწყვეტა გასულ თვეში გამოაცხადა და თქვა, რომ საომარი მოქმედებების სამუდამოდ დასრულების საკითხი ვაშინგტონში ორი ქვეყნის ლიდერების პირისპირ შეხვედრაზე განიხილებოდა.

ჯერჯერობით ლიდერებს შორის მოლაპარაკებები არ შემდგარა, თუმცა რუბიომ აღნიშნა, რომ აშშ „ამ პროცესის ერთგულია“.

„ეს ადვილი არ იქნება. ჩვენ ყველაფერს გავაკეთებთ იმისათვის, რომ ორივე მხარემ განაგრძოს მოლაპარაკებები, რათა პროგრესი იყოს რაიმე სახის მუდმივი ცეცხლის შეწყვეტის მიმართულებით, რომელსაც მუდმივად არ დაარღვევს „ჰეზბოლა“ და „ჰეზბოლას“ ძალადობა“, - განაცხადა მან.