თორნიკე ჭეიშვილი: მისასალმებელია ის გარემოება, რომ დღეს აშშ-ის ადმინისტრაცია, პრეზიდენტი ტრამპი აბსოლუტურად ანალოგიურ შეფასებებს აძლევენ ევროკავშირში მიმდინარე პროცესებს, საუბრობენ იმ კრიზისზე, რომელზედაც უკვე არაერთი წელია ვლაპარაკობთ

მისასალმებელია ის გარემოება, რომ დღეს შეერთებული შტატების ადმინისტრაცია, თავად პრეზიდენტი ტრამპი აბსოლუტურად ანალოგიურ შეფასებებს აძლევენ ევროკავშირში მიმდინარე პროცესებს, საუბრობენ იმ კრიზისზე, რომელზედაც უკვე არაერთი წელია ვლაპარაკობთ, - განაცხადა გადაცემაში „დღის ქრონიკა“ იურიდიულ საკითხთა საპარლამენტო კომიტეტის თავმჯდომარის პირველმა მოადგილე თორნიკე ჭეიშვილმა.

დეპუტატის თქმით, როდესაც ძალიან მსხვილი გეოპოლიტიკური მოთამაშეები ესაუბრებიან ევროკავშირს იმაზე, რომ რაღაც უნდა შეიცვალოს და ორგანიზაციაში რეფორმები უნდა განხორციელდეს, ეს ძალიან მძლავრი წინაპირობაა იმისთვის, რომ საღი აზრი იმძლავრებს.

„თავად ევროკავშირში უკვე სახელმწიფოთა მეთაურები საუბრობენ იმაზე, რომ ასე გაგრძელება აღარ შეიძლება. რეალურად, ის ფაქტორი, როდესაც დანიშნული ევრობიუროკრატები აბსოლუტურად სცდებიან ევროკავშირის სადამფუძნებლო პრინციპებს, მიაქანებენ ყველაფერს სერიოზული ცივილიზაციური უფსკრულისკენ, როდესაც გაუფერულდა ევროპული ღირებულებები, რომლებზეც ასე ბევრს ვსაუბრობთ, საბოლოო ჯამში არის იმის წინაპირობა, რომ ადრე თუ გვიან ევროკავშირმაც უნდა გადახედოს თავის პოლიტიკურ კურსს, თავის მიზნებს და თავის ადგილს თანამედროვე მსოფლიო წესრიგში“, - განაცხადა ჭეიშვილმა.

მისივე თქმით, ევრობიუროკრატიისთვის განგაშის სიგნალი უკვე ჩართულია და მათი მხრიდან მოქმედების დრო დადგა.