ლევან მაჭავარიანი: ჩვენი მთავარი სურვილი და კანონის მიზანი არის ის, რომ ადამიანი არ უნდა გადავიდეს რაღაც ზღვარს შეურაცხყოფის დროს

ჩვენი მთავარი სურვილი და კანონის მიზანი არის ის, რომ ადამიანი არ უნდა გადავიდეს რაღაც ზღვარს შეურაცხყოფის დროს, - განაცხადა „დღის ქრონიკაში" პარლამენტის ფრაქცია „ქართული ოცნების“ თავმჯდომარის მოადგილემ ლევან მაჭავარიანმა.

დეპუტატი ფრაქცია „ქართული ოცნების" მიერ რადიკალური ჯგუფების მხრიდან ზიზღისა და სიძულვილის კამპანიაზე სამართლებრივი დავის დაწყებას გამოეხმაურა.

„ჩვენი ერთ-ერთი დაპირება საზოგადოებისადმი არის ის, რომ აუცილებლად უნდა დასრულდეს საქართველოში ფსევდო ლიბერალური ფაშიზმი, რომელმაც უკვე არნახულ მასშტაბებს მიაღწია. ჩვენ კანონშიც ცვლილება შევიტანეთ მიმდინარე წლის თებერვალში და შესაბამისად, ყველა ვალდებულია, რომ კანონს სცეს პატივი. აქ არაფერი განსაკუთრებული არ არის. რა თქმა უნდა, ოპოზიცია აჟიოტაჟს ატეხდა, როგორც ყველა თემაზე, მაგრამ აქ უჩვეულო არაფერია.

ჩვენი სურვილი რა არის და კანონი რას ითვალისწინებს, რომ რაღაც ზღვარს მიღმა არ უნდა გადავიდეს არავინ შეურაცხყოფის დროს. კი, რა თქმა უნდა კრიტიკა მისაღებია, შეიძლება ვიღაც რაღაცაში არ გვეთანხმებოდეს და ამაში ყველა თავისუფალია, რომ შეკრება გააკეთოს, მიტინგი მოაწყოს, სოციალურ ქსელში პოზიცია დააფიქსიროს, მაგრამ როდესაც ეს უკვე გადავიდა ისეთ სტადიაზე, სადაც შეურაცხყოფას აყენებენ არა მხოლოდ პოლიტიკოსებს ან თანამდებობის პირებს, არამედ ოჯახის წევრებსაც გადასწვდნენ და ა.შ. რა თქმა უნდა, კანონმა ამას უნდა უპასუხოს. ეს ჩვენი უფლებაც არის და ვალდებულებაც. პარლამენტი არა მხოლოდ კანონის მიღებაზე მუშაობს, რა თქმა უნდა ეს კანონი შემდეგ უნდა აღსრულდეს კიდეც“, - განაცხადა მაჭავარიანმა.

მან ასევე უპასუხა წამყვანის კითხვას, არის თუ არა განსაზღვრული რა არის გამოხატვის თავისუფლების ფარგლებში კრიტიკა და რა განიხილება კანონდარღვევად.

„ნებისმიერი გადაწყვეტილება, რაც იქნება ნებისმიერი ორგანოს მიერ, რა თქმა უნდა, ამას მოჰყვება პოლიტიკური სპეკულაციები. ამას ჩვენი მიჩვეულები ვართ და ეს ჩვენი მოქალაქეებისთვის სიახლეს არ წარმოადგენს. რა განისაზღვრება კანონდარღვევად ამას კონკრეტული უწყებები თავად გადაწყვეტენ, თუმცა რა თქმა უნდა, როდესაც ადამიანს და მისი ოჯახის წევრებს შეურაცხყოფას აყენებ და აგინებ, ეძახი შეურაცხმყოფელ სიტყვებს, მონას ეძახი და ა.შ. იქ კითხვის ნიშანი არავის უნდა უჩნდებოდეს, ეს არის თუ არა შეურაცხყოფა“,- აღნიშნა მაჭავარიანმაა.

ფრაქცია „ქართული ოცნება“ რადიკალური ჯგუფების ზიზღისა და სიძულვილის კამპანიაზე სამართლებრივ დავას იწყებს. საჩივრით მიმართავს შინაგან საქმეთა სამინისტროს იმ პირთა წინააღმდეგ, რომლებიც სოციალურ ქსელებში სიძულვილის ენისა და ტერორის პროპაგანდით სახელმწიფო ინსტიტუტების დისკრედიტაციას ცდილობენ.