ლევან მაჭავარიანი პარლამენტის ახალი რეგლამენტის პროექტზე - „უფრო მოქნილს ხდის საპარლამენტო მუშაობას“

პარლამენტის ფრაქცია „ქართული ოცნების“ თავმჯდომარის მოადგილე, ლევან მაჭავარიანი პარლამენტის ახალი რეგლამენტის პროექტს გამოეხმაურა.

მაჭავარიანის თქმით, ინიციატივა საპარლამენტო მუშაობას მეტად მოქნილს ხდის.

„ეს უფრო მოქნილს ხდის საპარლამენტო მუშაობას. ნაკლები ბიუროკრატია იქნება და ყველგან, სადაც ნაკლები არის ბიუროკრატია, რა თქმა უნდა, უფრო ეფექტური არის სამუშაო პროცესიც. იქ რამდენიმე მნიშვნელოვან ფაქტს გამოვყოფდი - მაგალითად, მოქალაქეს თავისი ინიციატივით შეუძლია მიმართოს არა კომიტეტს, არამედ უშუალოდ დეპუტატს. იქნება ძალიან მნიშვნელოვანი ცვლილება იმასთან დაკავშირებით, რომ ეს ინტერპელაცია, ფაქტობრივად, გაორმაგდება,“ - აცხადებს მაჭავარიანი.

ინფორმაციისთვის, მმართველი გუნდის მიერ შეთავაზებული საკანონმდებლო წინადადებით, ორმაგდება სხვადასხვა ანგარიშვალდებულ პირთა ინტერპელაციების რაოდენობა, რის გამოც დანიშნულებას კარგავს „მინისტრის საათი“ და ის უქმდება.

ახალი რეგლამენტი ასევე ითვალისწინებს პარლამენტის საქმიანობის ერთიანი წლიური ანგარიშის შემოღებას, რომელიც შემუშავდება პარლამენტის სპიკერისა და კომიტეტების ერთობლივი მუშაობით, ახლებურად ყალიბდება ზოგიერთი კომიტეტის სახელწოდება.