მამუკა მდინარაძე: საპარლამენტო ცხოვრება მიდის, 2012 წლიდან რისი მიღებაც გარედან გვაიძულეს, მისი გასწორება მიმდინარეობს, რათა მაქსიმალურად მოერგოს დამოუკიდებლობის გაზრდის ხარისხის ინტერესებს

 საპარლამენტო ცხოვრება მიდის, კანონების მიღება სწრაფ ტემპში მიმდინარეობს, მავნებლობით არავინ გვიშლის ხელს, გადაწყვეტილებასაც ვიღებთ და რაც ყველაზე მეტად მიხარია ქვეყნისთვის, რაც 2012 წლიდან გვაიძულეს გარედან, მიგვეღო, ამ ყველაფრის გასწორება მიდის, რომ მაქსიმალურად მოერგოს დამოუკიდებლობის გაზრდის ხარისხის ინტერესებს, – ამის შესახებ „ქართული ოცნების“ აღმასრულებელმა მდივანმა მამუკა მდინარაძემ განაცხადა.

მდინარაძის თქმით, საპარლამენტო ცხოვრება აქტიურად მიმდინარეობს და იმაზე მეტი გადაწყვეტილებები მიიღება, ვიდრე წინა მოწვევის პარლამენტში.

მისივე განცხადებით, საქართველოს პარლამენტი, რომლის ლეგიტიმაციის ეჭვქვეშ დაყენება ზოგიერთებს სურთ, მყარად დგას და ბევრ გადაწყვეტილებას იღებს.

„შეუძლებელია, რომ შალვას პოსტებს გაეცნო და არ დააფასო სწორად ის, რასაც აკეთებს. ქრესტომათიული სიზუსტით აღწერს ხოლმე მოვლენებს, როგორ ვითარდებოდა ხოლმე პროცესები ბოლო პერიოდში, ეს არის თანამედროვე ისტორია, რეალობა, რა დარტყმებს უძლებს ქვეყნის გარედან სახელმწიფო, რამდენად ამაყად და მყარად დგას საქართველო. ჩვენ გვაქვს თანამედროვე ისტორია, რომლითაც, ვფიქრობ, წლების შემდეგ ქართველები ვიამაყებთ და ჩვენი შვილები იამაყებენ, რომ საქართველომ ასე გაუძლო წნეხს, რომელიც გარედან მოდიოდა და შიდა აგენტურის მიერ მისი რეალიზების მცდელობა ხდებოდა ხოლმე. საქართველოს პარლამენტიც, რომლის ლეგიტიმაციის ეჭვქვეშ დაყენება უნდათ ვიღაც-ვიღაცებს, ფეხზე დგას, მყარად დგას, ბევრ გადაწყვეტილებას იღებს, უფრო მეტ გადაწყვეტილებას, ვიდრე ე.წ. ოპოზიციის მავნებლობის პერიოდში ვახერხებდით და თან ისეთ გადაწყვეტილებებს, რომელთან დაკავშირებითაც ხმას ვეღარავინ იღებს. მაგალითად, როცა წინა მოწვევის პარლამენტში „გამჭვირვალობის კანონზე“ ჩამოაქციეს ქვეყანა ორი წლის განმავლობაში, რომელიც იყო თითქოს რუსული, ახლა მივიღეთ უფრო მკაცრი კანონი, უფრო გაბედული ნაბიჯი გადავდგით და ამაზე ხმა ვეღარ ამოიღეს, რადგან ეს იყო ამერიკული „ფარას“ ანალოგი და ამასობაში, საზოგადოებასაც გათვითცნობიერებული ჰქონდა, რასთან იყო საქმე და რა საუკუნის აფიორა შემოგვთავაზეს აგენტურამ და მათმა პატრონებმა. როცა „ხალხის ძალამ“ ის დაარეგისტრირა, იყო ამერიკული ვერსია, მაგრამ მაშინ იმდენად უინფორმაციოდ იყო საზოგადოება, ვერ შევძელით ამის გატანა. სწორედ ეს არის განსხვავება წინა მოწვევის პარლამენტსა და ამ პარლამენტს შორის.

საპარლამენტო ცხოვრება მიდის, კანონების მიღება სწრაფ ტემპში მიმდინარეობს, მავნებლობით არავინ გვიშლის ხელს, გადაწყვეტილებასაც ვიღებთ და რაც ყველაზე მეტად მიხარია ქვეყნისთვის, რაც 2012 წლიდან გვაიძულეს გარედან, მიგვეღო, ამ ყველაფრის გასწორება მიდის, რომ მაქსიმალურად მოერგოს დამოუკიდებლობის გაზრდის ხარისხის ინტერესებს“, – განაცხადა მდინარაძემ.