„ტკივილი და სიცარიელე“ - ორბანმა საპარლამენტო არჩევნებში მისი პარტიის დამარცხებაზე პირველი კომენტარი გააკეთა

უნგრეთის პრემიერ-მინისტრმა ვიქტორ ორბანმა საპარლამენტო არჩევნებში მისი პარტიის დამარცხებაზე პირველი კომენტარის გაკეთებისას განაცხადა, რომ „ტკივილსა და სიცარიელეს“ გრძნობს. ამის შესახებ ორბანმა Patrióta-სთან ინტერვიუში ისაუბრა.

როგორც ორბანმა აღნიშნა, დარწმუნებული იყო, რომ არჩევნებში მისი პარტია „ფიდესი“ გაიმარჯვებდა, ამიტომ ახლა „ტკივილსა და სიცარიელეს გრძნობს“. მან აღნიშნა, რომ სამუშაოს „თერაპიად“ იყენებს და ბევრს შრომობს, რათა დამარცხებით გამოწვეულ სტრესს გაუმკლავდეს.

უნგრელმა პოლიტიკოსმა ხაზგასმით აღნიშნა, რომ არჩევნების შედეგებზე სრულ პასუხისმგებლობას იღებს. მან აღიარა, რომ „ფიდესმა“ ვერ შეძლო ამომრჩეველთან ეფექტური საკომუნიკაციო გზის პოვნა.

„მე ვარ პარტიის ლიდერი და შედეგებზე 100%-იან პასუხისმგებლობას ვიღებ. უნდა ვაღიარო, რომ ჩემი ოპონენტის სიტყვები უფრო ძლიერი იყო“, - დასძინა მან.

არჩევნების შედეგების მიუხედავად, ორბანმა განაცხადა, რომ პარტიის ლიდერის თანამდებობას არ დატოვებს. ამასთან, მან გამოაცხადა „ფიდესის“ „სრული გადატვირთვა“ - პოლიტიკური ძალა თავის მომავალ სტრატეგიასა და საკადრო ცვლილებებს 28 აპრილს დაგეგმილ პარტიულ ყრილობაზე განიხილავს.

„თუ ჩემი თანაგუნდელები მეტყვიან, რომ „სკამზე დავჯდე“, ამას გავაკეთებ. მაგრამ თუ ისინი მეტყვიან, რომ „გუნდს მოედანზე გავუძღვე“, როგორც კაპიტანი, მე იქ ვიქნები“, - ხაზგასმით აღნიშნა უნგრელმა პოლიტიკოსმა.

ცნობისთვის, 12 აპრილს პეტერ მადიარის მეთაურობით პარტია „ტიზამ“ უნგრეთის საპარლამენტო არჩევნებში ორბანის მმართველი პარტია „ფიდესი“ დაამარცხა. ბიულეტენების 98.9%-ის დათვლის შემდეგ მან ხმების 53.07% მიიღო და პარლამენტში 199 ადგილიდან 138 მოიპოვა.