მაკა ბოჭორიშვილი: თბილისის პასუხი არის ის, რომ ჩვენ საქართველოს ტერიტორიების ოკუპაციას ვერ შევეგუებით. ვერც იმას შევეგუებით, რომ საქართველოს ტერიტორიული მთლიანობა იყოს დარღვეული

 თბილისის პასუხი არის ის, რომ ჩვენ საქართველოს ტერიტორიების ოკუპაციას ვერ შევეგუებით, - განაცხადა გადაცემაში „იმედი LIVE“ საქართველოს საგარეო საქმეთა მინისტრმა მაკა ბოჭორიშვილმა, რითაც უპასუხა წამყვანის კითხვას, რომ „სეპარატისტული აფხაზეთის ხელისუფლების მხრიდან გავრცელდა მოწოდება გაუქმდეს საოკუპაციო კანონი, რა არის პასუხი თბილისიდან“.

როგორც მაკა ბოჭორიშვილმა აღნიშნა, საქართველოს ხელისუფლება ვერც იმას შეეგუება, რომ ტერიტორიული მთლიანობა იყოს დარღვეული.

„თბილისის პასუხი არის ის, რომ ჩვენ საქართველოს ტერიტორიების ოკუპაციას ვერ შევეგუებით. ვერც იმას შევეგუებით, რომ საქართველოს ტერიტორიული მთლიანობა იყოს დარღვეული და ჩვენ იმასაც ვამბობთ, რომ ჩვენი სურვილი და მიზანი არის მოვნახოთ მშვიდობიანი გზა, თუ როგორ ვიცხოვროთ ერთ სახელმწიფოში ჩვენს აფხაზ და ოს ძმებთან და დებთან ერთად. როგორღაც ეს საკითხი, რომელიც ეხება საქართველოს ტერიტორიების ოკუპაციას და საქართველოს ტერიტორიულ მთლიანობას, მშვიდობიანი გზით იყოს გადაჭრილი. ამ შემთხვევაში ოკუპაციის კანონიც ერთგვარი დაცვის მექანიზმია საქართველოსთვის იმისათვის, რომ რუსეთის მხრიდან რაღაცნაირად პრევენცია მოხდეს აფხაზეთსა და ოსეთთან ურთიერთობებისა.

ეუთოს გენერალური მდივნის ვიზიტიც ამ თვალსაზრისით მნიშვნელოვანი იყო იმიტომ, რომ ეუთო არის ის ადგილი, სადაც ჩვენ ვსაუბრობთ ამ თემაზე, სადაც მუდმივად ვაჟღერებთ საქართველოს ტერიტორიების ოკუპაციის თემას და მუდმივად არის, ასე, ვთქვათ საერთაშორისო პარტნიორებთან ამ თემაზე დისკუსია. აქედან გამომდინარე, მნიშვნელოვანი იყო ეუთოს გენერალურ მდივანს თავისი თვალით ენახა თუ როგორ გამოიყურება ფიზიკურად ოკუპაცია და როგორია საოკუპაციო ხაზთან, მიმდებარედ ვითარება, რაზედაც ვსაუბრობთ ხოლმე“, - აღნიშნა მაკა ბოჭორიშვილმა.