სოფელ ატენში დაკავებულ სამართალდამცველს ბრალი დაუმძიმდა

საქართველოს პროკურატურამ გორის მუნიციპალიტეტის სოფელ ატენში ჯანმრთელობის განზრახ მძიმე დაზიანების ფაქტზე დაკავებულ სამართალდამცველს და მასთან ერთად დაკავებულ კიდევ ერთ პირს, ჯანმრთელობის განზრახ მძიმე დაზიანების ფაქტზე ბრალდება დაუმძიმა. მათ 9-დან 13 წლამდე პატიმრობა ემუქრებათ.

როგორც უწყებაში აცხადებენ, ახალი მტკიცებულებებით დადგინდა, რომ ბრალდებულებმა დაზარალებულს ჯგუფურად მიაყენეს სიცოცხლისთვის სახიფათო დაზიანებები.

„სპეციალური საგამოძიებო სამსახურის მიერ ჩატარებული გამოძიების შედეგად მოპოვებული ახალი მტკიცებულებებით დადგინდა, რომ 29 ივლისს, სოფელ ატენში, შინაგან საქმეთა სამინისტროს განსაკუთრებულ დავალებათა დეპარტამენტის ინსპექტორმა დ.რ-მ და ი.ბ.-მ ჯგუფურად, დაზარალებულს თავისა და სხეულის არეში ჯანმრთელობის მძიმე, სიცოცხლისთვის სახიფათო დაზიანებები მიაყენეს“, - ნათქვამია განცხადებაში.

როგორც პროკურატურაში აღნიშნავენ, ორივე მათგანს დაზუსტებული ბრალდება საქართველოს სისხლის სამართლის კოდექსის 117-ე მუხლის მესამე ნაწილის „ლ“ ქვეპუნქტით წარედგინა, რაც ჯანმრთელობის ჯგუფურად, განზრახ მძიმე, სიცოცხლისთვის სახიფათო დაზიანებას გულისხმობს.