გიორგი კალანდარიშვილი: პროპაგანდისტული კამპანიების შედეგია, რომ საზოგადოების გარკვეულ ნაწილს შეუქმნა აღქმა, თითქოს არჩევნები გაყალბდა - გაყალბება, ეს არის ძალიან მძიმე ბრალდება და ასე ჰაერზე, უსაფუძვლოდ საუბარი არ შეიძლება

„პროპაგანდისტული კამპანიების შედეგია, რომ საზოგადოების გარკვეულ ნაწილს შეუქმნა იმის აღქმა, რომ თითქოს არჩევნები გაყალბდა, თითქოს საარჩევნო ადმინისტრაცია არის მძიმე შემთხვევა და ა.შ.“ - ამის შესახებ ცესკოს თავმჯდომარემ გიორგი კალანდარიშვილმა განაცხადა.

როგორც კალანდარიშვილმა აღნიშნა, გაყალბება, მანიპულაცია, ძალიან მძიმე ბრალდება და უსაფუძვლოდ საუბარი არ შეიძლება.

„მოდით ფაქტებით ვისაუბროთ: დღეის მდგომარეობით, სადაც დარღვევა იყო, იყო შესაბამისი სამართლებრივი რეაგირება, გატარდა შესაბამისი ზომები. გვესმოდა ბრალდებები, რომელთა გამოკვლევა ჩვენ ხელთ არ გვეწიფებოდა და ჩვენი ინსტიტუციის კომპეტენციას არ შეესაბამებოდა, ამიტომ მივმართეთ პროკურატურას რომ კომპლექსური გამოძიების ფარგლებში ობიექტური ჭეშმარიტება დადგენილიყო და საზოგადოებას ჰქონოდა სწორი ინფორმაცია და ამასთანავე სათანადო რეაგირება განხორციელებულიყო ბრალდებებთან მიმართებით.

რამდენიმე კვირის წინ ვნახეთ პროკურატურის შუალედური დასკვნა, რომელშიც ცალსახად იკითხება, რომ არანაირი მტკიცებულებები გაჟღერებულ ბრალდებებთან მიმართებით არ არის წარდგენილი, რომელიც მისცემდა პროკურატურას ან ჩართულ მხარეს იმის თქმის შესაძლებლობას, რომ რაიმე სისხლის სამართლის დანაშაულს ჰქონდა ადგილი. გაყალბება, მანიპულაცია, ეს არის ძალიან მძიმე ბრალდება და მისი ასე, ჰაერზე, უსაფუძვლოდ საუბარი არ შეიძლება.

დღეს საზოგადოებაში კვლავ მიდის იმ აღქმის ფორმირება, რომ ერთი - თითქოს 26 ოქტომბრის არჩევნები გაყალბდა და მეორე, ამით მიდის იმ ბმის გაკეთება, რომ თითქოს ეს არჩევნებიც (თვითმმართველობის) იქნება მანიპულირებადი“, - აღნიშნა კალანდარიშვილმა.