ვოლოდიმირ ზელენსკი - უკრაინა ყოველთვის მხარს უჭერდა დიპლომატიას, მე მზად ვარ, ჩავიდე თურქეთში, მოსკოვი მთელი დღის განმავლობაში დუმს პირისპირ შეხვედრის წინადადებასთან დაკავშირებით

უკრაინის პრეზიდენტმა, ვოლოდიმირ ზელენსკიმ განაცხადა, რომ მზადაა თურქეთში ჩასვლისთვის და რუსეთთან პირისპირ მოლაპარაკებებისთვის, თუმცა აღნიშნა, რომ მოსკოვისგან ჯერ პასუხი არ მიუღია აღნიშნულ წინადადებაზე.

„უკრაინა ყოველთვის მხარს უჭერდა დიპლომატიას. მე მზად ვარ, ჩავიდე თურქეთში“, – განაცხადა ზელენსკიმ ყოველდღიურ ვიდეომიმართვაში.

უკრაინის პრეზიდენტის თქმით, რუსეთი კვლავ აგრძელებს საომარ მოქმედებებს.

„სამწუხაროდ, მსოფლიომ ჯერ კიდევ ვერ მიიღო მკაფიო პასუხი რუსეთისგან ცეცხლის შეწყვეტის წინადადებებზე. რუსული დაბომბვები და თავდასხმები გრძელდება. მოსკოვი მთელი დღის განმავლობაში დუმს პირისპირ შეხვედრის წინადადებასთან დაკავშირებით. ძალიან უცნაური დუმილია“, – აღნიშნა ზელენსკიმ.

ვოლოდიმირ ზელენსკის განცხადებით, რუსეთს არ დარჩება სხვა გზა, გარდა იმისა, რომ დაასრულოს ეს ომი.

„ასე თუ ისე, რუსეთს მოუწევს ამ ომის დასრულება და რაც უფრო მალე, მით უკეთესი“, – ამბობს უკრაინის პრეზიდენტი.

უკრაინის პრეზიდენტმა ასევე აღნიშნა, რომ თურქეთის პრეზიდენტი მზადაა, უმასპინძლოს ამ შეხვედრას, ხოლო აშშ-ის პრეზიდენტის, დონალდ ტრამპის მხარდაჭერა მნიშვნელოვანია ამ პროცესისთვის.

„მნიშვნელოვანია, რომ პრეზიდენტი ტრამპი სრულად უჭერს მხარს შეხვედრას და გვსურს, რომ მან გამონახოს შესაძლებლობა, ჩავიდეს თურქეთში“, – დასძინა უკრაინის ლიდერმა.