ლევან მაჭავარიანი ოპოზიციონერი აქტივისტის რუსეთში სტუმრობაზე: საუბრობენ, თითქოს მათთვის მორალურად წარმოუდგენელია, შემდეგ აღმოჩნდება ხოლმე, რომ ზუსტად იმას აკეთებენ, რაზედაც საუბრობენ, რომ თურმე მორალურად მიუღებელი ყოფილა. ისინი საზრდოობენ ამ ყველაფრით

ისინი არიან ფარისევლები. რაღაცაზე საუბრობენ, რომ თითქოს ეს მათთვის მორალურად წარმოუდგენელია, შემდეგ აღმოჩნდება ხოლმე, რომ ზუსტად იმას აკეთებენ, რაზედაც საუბრობენ, რომ თურმე მორალურად მიუღებელი ყოფილა. ისინი საზრდოობენ ამ ყველაფრით, - ასე ეხმაურება ფრაქცია „ქართული ოცნების“ თავმჯდომარის პირველი მოადგილე ლევან მაჭავარიანი ოპოზიციის აქტივისტის, თეონა ბაღდავაძის რუსეთში სტუმრობასთან დაკავშირებულ ინფორმაციას.

ლევან მაჭავარიანის თქმით, ისინი სწორედ იმას აკეთებენ, რასაც თავად ვითომდა გმობენ.

„ერთი დასკვნის გამოტანა არის შესაძლებელი, რომ ისინი არიან ყალბები, ფსევდოლიბერალი ულტრამემარცხენე აქტივისტები. ისინი არიან ფარისევლები. რაღაცაზე საუბრობენ, რომ თითქოს ეს მათთვის მორალურად წარმოუდგენელია, შემდეგ აღმოჩნდება ხოლმე, რომ ზუსტად იმას აკეთებენ, რაზედაც საუბრობენ, რომ თურმე მორალურად მიუღებელი ყოფილა. ისინი საზრდოობენ ამ ყველაფრით. ზოგი დაფინანსებულია, ზოგი რაღაც პრივილეგიებით სარგებლობს, ზოგს ის სიამოვნებს, რომ ყურადღების ცენტრშია ვინაიდან ემოციურად არის ძალიან დაზიანებული და ამაში პოულობს რაღაც ტიპის ხსნას მაგალითად ქალბატონი ბაღდავაძეც“, - განაცხადა ლევან მაჭავარიანმა.

„პრაიმტაიმის“ ინფორმაციით, ოპოზიციის აქტივისტი თეონა ბაღდავაძე, აგვისტოს ომის შემდეგ, რუსეთში სამჯერ იმყოფებოდა. როგორც გამოცემა წერს, მათ შორის, პირველად მაშინ, როდესაც ომიდან სამი წელიც არ იყო გასული.

პრაიმტაიმის ინფორმაციით, ბაღდავაძე ადასტურებს, რომ მოსკოვში, აგვისტოს ომის შემდეგ, იმყოფებოდა ახლობლის დაკრძალვაზე.

„ქრონიკა“ თეონა ბაღდავაძეს დაუკავშირდა, თუმცა მან თემის გადაფარვა ირონიით სცადა. „ქრონიკის“ ჟურნალისტის მიერ გაგზავნილ შეტყობინებაზე პასუხის მაგივრად კი ჟურნალისტის ტელეფონის ნომერი სოციალურ ქსელში გამოაქვეყნა.