შალვა პაპუაშვილი: უსაფრთხო, მშვიდი გარემოს შენარჩუნება დღეს გამოწვევაა ჩვენი რეგიონისთვის, რაშიც საპარლამენტო დიპლომატიას გადამწყვეტი როლი აქვს

 შალვა პაპუაშვილმა თურქეთში ვიზიტი შეაჯამა. საქართველოს პარლამენტის თავმჯდომარემ აღნიშნა, რომ არის საკითხები, რომლებიც მნიშვნელოვანია ორივე ქვეყნის მშვიდობიანი განვითარებისთვის, რაშიც მნიშვნელოვან როლს საპარლამენტო დიპლომატია ასრულებს.

„ეს ჩემი პირველი ოფიციალური ვიზიტია თურქეთის პარლამენტის თავმჯდომარის მოწვევით. მიხარია, რომ მაქვს შესაძლებლობა, მას ვესტუმრო. პარლამენტში გვქონდა შეხვედრა პარლამენტის თავმჯდომარესთან, მეგობრობის ჯგუფის წარმომადგენლებთან, კომიტეტების წარმომადგენლებთან.

გვაქვს საკითხები, რომლებიც მნიშვნელოვანია ორივე ქვეყნის მშვიდობიანი განვითარებისა და ორივე ქვეყნის მოსახლეობის კეთილდღეობისთვის. უპირველეს ყოვლისა, ეს ეხება უსაფრთხო, მშვიდი გარემოს შენარჩუნებას, რაც დღეს გამოწვევაა ჩვენი რეგიონისთვის და პარლამენტებს, საპარლამენტო დიპლომატიას გადამწყვეტი როლი აქვს. ჩვენი ქვეყნის კეთილდღეობის ზრდისა და, ზოგადად, რეგიონისთვის ეკონომიკურ განვითარებას, შუა დერეფანს რომ გადამწყვეტი მნიშვნელობა აქვს, მგონი, ამ დღეებში ბევრმა გააცნობიერა მას შემდეგ, რაც რუკას დახედა და აღმოაჩინა, ფრენების გადამისამართება საით მოხდა. ეს ყველაფერი აჩვენებს, რომ მშვიდობას და მშვიდობიან განვითარებას აქვს პერსპექტივა, ხოლო სადაც არის ომი, ბუნდოვანი გარემო, იქ განვითარება რთულია.

ჩვენი ორი პარლამენტი ამ მხრივ თანამშრომლობას აპირებს. ასევეა რეგიონული თანამშრომლობა. ორი წლის წინ დავაინიცირეთ სამმხრივი ფორმატი თურქეთი-საქართველო-აზერბაიჯანის პარლამენტის თავმჯდომარეების მონაწილეობით და პირველი შეხვედრა უნდა გამართულიყო 2023 წელს თურქეთში, თუმცა მაშინ მიწისძვრის გამო შეხვედრა გადაიდო. შევთანხმდით, რომ წელს აუცილებლად გავმართოთ პირველი სამმხრივი შეხვედრა პარლამენტების თავმჯდომარეების დონეზე, სადაც თურქეთის, აზერბაიჯანის, საქართველოს პარლამენტის თავმჯდომარეების დონეზე იქნება განხილული საპარლამენტო თანამშრომლობა რეგიონულ ჭრილში. გარდა ამისა, ჩვენ ცოტა ხანში ვუმასპინძლებთ თურქეთის პარლამენტის დელეგაციას, შემოდგომაზე დაგეგმილია საქართველოს პარლამენტის თავდაცვისა და უსაფრთხოების კომიტეტის ვიზიტი თურქეთში. ასე რომ, კიდევ უფრო გამყარდება ეს ურთიერთობები, რომლებიც, მათ შორის, ორ პარლამენტს შორის თანამშრომლობის მემორანდუმს ეფუძნება“, - განაცხადა პაპუაშვილმა.