არჩილ გორდულაძე: „გორბის“ კვლევა ადასტურებს, რომ „ქართულ ოცნებას“ მოსახლეობის უდიდესი ნაწილის მხარდაჭერა აქვს

„გორბის“ კვლევა ადასტურებს, რომ „ქართულ ოცნებას“ საქართველოს მოსახლეობის უდიდესი ნაწილის მხარდაჭერა აქვს და შესაბამისად, გვაქვს მოლოდინი და დარწმუნებულები ვართ, რომ 64-ვე მუნიციპალიტეტში თვითმმართველობის არჩევნების მიმდინარეობისას ჩვენ დამაჯერებელ გამარჯვებას მოვიპოვებთ, - განაცხადა იურიდიულ საკითხთა საპარლამენტო კომიტეტის თავმჯდომარემ, არჩილ გორდულაძემ.

მისი თქმით, საქართველოს მოსახლეობა აგენტურას არასდროს აირჩევს.

„რაც შეეხება ე.წ. ოპოზიციონერების შედეგებს, ფაქტია, რომ მათი შედეგები სულ უფრო და უფრო მცირდება, იმიტომ, რომ ასეთია ქართველი ხალხის გადაწყვეტილება, ისინი აგენტურას არასდროს დაუჭერენ მხარს“, - აღნიშნა გორდულაძემ.

ინფორმაციისთვის, საქართველოს საზოგადოებრივი აზრის და ბიზნესის კვლევის საერთაშორისო ცენტრმა „გორბიმ“ ტელეკომპანია „იმედის“ დაკვეთით კვლევა ჩაატარა.

კითხვაზე, პარლამენტის არჩევნები ამ კვირას რომ ტარდებოდეს, ვის მისცემდით ხმას შემდეგი პარტიებიდან? გამოკითხულთა 56,2%-მა „ქართულ ოცნება“ დაასახელა.

ტელეკომპანია „იმედის“ დაკვეთით საქართველოს საზოგადოებრივი აზრისა და ბიზნესის კვლევის საერთაშორისო ცენტრმა „გორბიმ“ საზოგადოებრივი აზრის კვლევა თბილისისა და ქვეყნის მასშტაბით, პირისპირი ინტერვიუირების მეთოდის გამოყენებით ჩაატარა. საველე სამუშაოები 2025 წლის 22 ივნისი - 5 ივლისს შესრულდა. შედგა 2300 პირისპირი ინტერვიუ საქართველოს ზრდასრულ მოქალაქესთან (18 წლის და მეტი ასაკის).