გორდულაძე ოპოზიციაზე: სულ რომ მუხლზე ჩოქვით შემოიარონ სვეტიცხოველი, გელათი და ნიკორწმინდამდეც ავიდნენ, მაინც ვერ შეძლებენ საზოგადოების მოტყუებას

სულ რომ მუხლზე ჩოქვით შემოიარონ სვეტიცხოველი, გელათი და ნიკორწმინდამდეც ავიდნენ, მაინც ვერ შეძლებენ საზოგადოების მოტყუებას, - განაცხადა გადაცემაში „იმედი Live“ პარლამენტის იურიდიულ საკითხთა კომიტეტის თავმჯდომარე არჩილ გორდულაძემ ოპოზიციაზე საუბრისას.

მისი თქმით, მხოლოდ „ნაციონალურ მოძრაობას“ შეუძლია საპატრიარქოს და პატრიარქის ლანძღვის შემდეგ ამტკიცონ, რომ მორწმუნეები არიან.

„სულ რომ მუხლზე ჩოქვით შემოიარონ სვეტიცხოველი, გელათი და ნიკორწმინდამდეც რომ ავიდნენ, მაინც ვერ შეძლებენ საზოგადოების მოტყუებას. ნახეს რა, რომ არ გამოდის რასაც ამდენი წლების განმავლობაში ცდილობენ - არ არის შესაძლებელი, რომ ის პატივისცემა, რაც არსებობს ეკლესიის, პატრიარქის მიმართ, ფეხქვეშ იყოს გათელილი, როდესაც ხედავენ, რომ არც ისტორიის გადახაზვაა შედეგების მომტანი, ახლა ცდილობენ, საკუთარი თავი წარმოაჩინონ იმათ, რაც ბუნებაში არ არიან.

წარმოვიდგინოთ, რომ მეგის ქარდავა გამოვიდეს და ადამიანის უფლებებზე დაიწყოს საუბარი, ეს ხომ შეუძლებელია? იგივე წარმატებით შეგვიძლია ვთქვათ, რომ გებელსმა ისაუბროს მედიათავისუფლებაზე“, - აღნიშნა გორდულაძემ.

საპარლამენტო უმრავლესობის წევრის თქმით, ოპოზიციას არ შეუძლია დამოუკიდებელი გადაწყვეტილებების მიღება, გარდა იმ შემთხვევებისა, როცა ერთმანეთს ლანძღავენ.

„ახლა ცდილობენ ძველი, მოქმედი და ყოფილი „ნაცები“ დაამტკიცონ რომ „ნაცები“ არ არიან. როგორ შეიძლება სააკაშვილ-ბოკერია-გვარამიას გაერთიანება არ იყოს „ნაცი?“ ამ პატარა პოლიტიკური ტრიუკებით ცდილობენ, საზოგადოება მოატყუონ, რომ იქნებ როგორმე მეთერთმეტე არჩევნებში მაინც ჰქონდეთ რაღაც წარმატების იოტისოდენა შანსი, მაგრამ მეთერთმეტედაც ისევე სახელოვნად დამარცხდებიან, როგორც ათჯერ უკვე დამარცხდნენ“, - დასძინა იურიდიულ საკითხთა კომიტეტის თავმჯდომარემ.