ლევან მაჭავარიანი: აგენტებს სურთ ხელისუფლებაში მოსვლა, ქვეყანა ომში რომ ჩართონ და როდესაც ნანგრევების აშენებისთვის ტრანშები წამოვა, ჯიბეში ჩაილაგონ, 2008 წელს აქვთ ეს გამოცდილება

„ქვეყანა თუ იქნება განადგურებული ასეთი არც ტრილიონები და არანაირი ფული არ გვსურს“, - ამის შესახებ ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა განაცხადა.

ლევან მაჭავარიანს კითხვა დაუსვეს „ოპოზიციის ალიანსის“ ერთ-ერთი ლიდერის, ნიკა გვარამიას განცხადებაზე, რომლის მიხედვითაც, „უკრაინა მალე რომ ომს მოიგებს, ტრილიონები დაიხარჯება უკრაინის აღდგენაში ათწლეულის განმავლობაში, აი, საქართველოს არ მიასუნინებენ იმ ტრილიონებთან. მთელი ევროპა იქნება მშენებლობით და ფულის კეთებით დაკავებული“.

„გვარამია და ამ ბოლო დროს ძალიან ბევრი ვეღარ იკავებს თავს, ამჟღავნებენ, გული ძალიან სწყდებათ, რომ საქართველო არ არის ომის მონაწილე, იგივე მდგომარეობაში არ არის, რა მდგომარეობაშიცაა უკრაინა. მანამდე ლომჯარია, „ნაცებიდან“ საყვარელიძე ამჟღავნებდნენ ამას. ამ აგენტებს სურთ ხელისუფლებაში მოსვლა, რომ საქართველო ომში ჩართონ და როდესაც ნანგრევების აშენებაზე იქნება საუბარი, რაღაცა ტრანშები წამოვა, ეს ტრანშები ჯიბეში ჩაილაგონ და გამდიდრდნენ. ეს არის ყოვლად ამორალური, მოღალატეობრივი განცხადება მისი მხრიდან, რომელიც ნამდვილად წამოცდენაა“, - აღნიშნა ლევან მაჭავარიანმა.

მისი თქმით, 2008 წლის ომის შემდეგ ძალიან მსხვილი ტრანშები წამოვიდა, არსებობს ეჭვი, რომ „ნაციონალური მოძრაობიდან“ რიგი ჩინოვნიკი ამ ტრანშებით გამდიდრდა.

„საუბარია შეიარაღების გაყიდვაზეც, რომელიც საქართველოს ჰქონდა, ტრანშებიდან ჯიბეში ფულის ჩადებაზე. მათ აქვთ ეს გამოცდილება და კიდევ ერთხელ უნდათ ეს ყველაფერი დიდი სიამოვნებით გაიმეორონ“, - დასძინა მმართველი გუნდის დეპუტატმა.